ᱟᱹᱫᱤᱵᱟᱹᱥᱤᱭᱟᱜ ᱫᱷᱚᱨᱚᱢ ᱤᱫᱤ ᱠᱟᱛᱮ ᱯᱚᱛᱚᱵ ᱯᱟᱛᱷᱟᱢ ᱠᱚᱨᱮ ᱟᱹᱰᱤ ᱞᱮᱠᱟᱱ ᱚᱱᱚᱞ ᱦᱟᱹᱞᱤ ᱨᱮ ᱧᱮᱞ ᱵᱟᱲᱟᱜ ᱠᱟᱱᱟ | All Orissa United Christian Forum  ᱯᱟᱦᱴᱟ ᱠᱷᱚᱱ ᱟᱹᱫᱤᱵᱟᱹᱥᱤ ᱫᱚ ᱦᱤᱸᱫᱩ ᱫᱚᱠᱚ ᱵᱟᱝ ᱠᱟᱱᱟ ᱢᱮᱱᱛᱮ ᱢᱮᱱ ᱟᱠᱟᱱᱟ | ᱱᱚᱛᱮ ᱥᱚᱨᱠᱟᱨᱤ ᱠᱟᱜᱚᱡᱽ ᱯᱚᱛᱚᱨ ᱟᱨ ᱟᱠᱚᱣᱟᱜ ᱜᱚᱲᱚ ᱥᱚᱦᱚᱫ ᱛᱮ ᱚᱞ ᱯᱟᱲᱦᱟᱣ ᱠᱟᱛᱮ ᱧᱟᱢ ᱟᱠᱟᱫ ᱥᱟᱨᱴᱤᱯᱷᱤᱠᱮᱴ ᱠᱚᱨᱮ ᱢᱟᱬᱟᱝᱫᱚ ᱟᱵᱚᱣᱟᱜ ᱩᱨᱩᱢ ᱫᱚ ᱦᱤᱸᱫᱩ ᱫᱷᱚᱨᱚᱢ ᱨᱤᱱ ᱢᱮᱱᱛᱮᱜᱮ ᱟᱹᱫᱤᱵᱟᱹᱥᱤ ᱭᱟᱜ ᱚᱞ ᱟᱠᱟᱱᱟ | ᱚᱢᱮᱱᱠᱷᱟᱱ, ᱟᱵᱚᱣᱟᱜ ᱞᱟᱭ ᱞᱟᱠᱪᱟᱨ ᱠᱚ ᱦᱤᱸᱫᱩᱣᱟᱜ ᱥᱟᱶ ᱛᱩᱞᱟᱹ ᱞᱮᱠᱷᱟᱱ ᱧᱮᱞᱚᱜᱚᱜᱼᱟ ᱟᱵᱚᱣᱟᱜ ᱫᱚ ᱥᱟᱹᱨᱤ ᱛᱮᱜᱮ ᱥᱟᱱᱛᱟᱲᱟᱜ ᱫᱚ ᱵᱷᱤᱱᱟᱹ ᱫᱷᱚᱨᱚᱢ ᱠᱟᱱᱟ | ᱛᱤᱱᱟᱹᱜ ᱜᱟᱱ ᱟᱹᱫᱤᱵᱟᱹᱥᱤ ᱫᱚ ᱦᱤᱸᱫᱩ ᱠᱚᱣᱟᱜ ᱥᱟᱶ ᱢᱮᱥᱟ ᱩᱛᱟᱹᱨᱚᱜ ᱠᱟᱱᱛᱮ ᱪᱮᱫ ᱨᱮᱦᱚᱸ ᱯᱷᱚᱨᱚᱠ ᱵᱟᱭ ᱯᱟᱸᱡᱟ ᱧᱟᱢᱚᱜᱼᱟ ᱛᱚᱵᱮ, ᱥᱟᱱᱛᱟᱲ ᱫᱚ ᱦᱤᱸᱫᱩ ᱫᱚᱠᱚ ᱵᱟᱝᱠᱟᱱᱟ | ᱱᱟᱦᱟᱜ ᱢᱟ ᱱᱤᱫᱷᱟᱹᱱ ᱱᱟᱪᱟᱨ ᱠᱚ ᱥᱩᱵᱤᱫᱷᱟᱹ ᱥᱮᱴᱮᱨ ᱟᱠᱚ ᱠᱷᱟᱹᱛᱤᱨ ᱠᱚ ᱟᱞᱚᱵ ᱮᱫ ᱠᱚᱣᱟ ᱦᱤᱸᱫᱩ ᱠᱷᱤᱨᱤᱥᱴᱤᱭᱟᱱ ᱮᱢᱟᱱ ᱫᱷᱚᱨᱚᱢ ᱛᱮ | ᱤᱥᱟᱹᱭ ᱯᱟᱦᱴᱟᱜ ᱠᱟᱱ ᱠᱷᱟᱱ ᱦᱤᱸᱫᱩᱠᱚ ᱥᱤᱠᱤᱲᱚᱜ ᱠᱟᱱᱟ | ᱥᱟᱱᱛᱟᱲᱟᱜ ᱵᱷᱮᱜᱟᱨ ᱫᱷᱚᱨᱚᱢ ᱢᱮᱱᱟᱜᱼᱟ ᱤᱫᱤ ᱠᱟᱛᱮ ᱪᱮᱫ ᱦᱚᱸ ᱵᱟᱝ ᱢᱮᱱᱮᱫ ᱠᱷᱟᱱ ᱤᱥᱟᱹᱭ ᱠᱚ ᱢᱮᱱᱮᱜᱼᱟ ᱱᱩᱠᱩᱣᱟᱜ ᱫᱚ ᱪᱮᱫ ᱫᱷᱚᱨᱚᱢ ᱜᱮ ᱵᱟᱹᱱᱩᱼᱟ | ᱱᱚᱛᱮ ᱦᱤᱸᱫᱩ ᱠᱚᱠᱚ ᱯᱚᱥᱲᱟ ᱢᱟᱝᱜᱟᱞ ᱠᱟᱭᱟ ᱚᱱᱟᱨᱡᱭᱚ, ᱚᱥᱤᱠᱷᱤᱛᱚ ᱢᱮᱱ ᱠᱟᱛᱮ | ᱮᱱᱠᱷᱟᱱ ᱚᱠᱟ ᱯᱟᱦᱴᱟ ᱨᱤᱱ ᱠᱟᱱᱟᱠᱚ ᱥᱟᱱᱛᱟᱲ ᱫᱚ ? ᱵᱤᱱ ᱫᱷᱚᱨᱚᱢ ᱟᱱ ᱦᱚᱲ ᱢᱮᱱᱠᱟᱛᱮ ᱠᱷᱨᱤᱥᱴᱤᱭᱟᱱ ᱠᱚᱠᱚ ᱩᱭᱦᱟᱹᱨ ᱟᱠᱟᱫᱟ ᱟᱹᱫᱤᱵᱟᱹᱥᱤ ᱤᱥᱟᱹᱭ ᱵᱚ ᱨᱮᱦᱚᱸ ᱥᱚᱨᱠᱟᱨ ᱪᱮᱫᱦᱚᱸ ᱟᱞᱚᱭ ᱢᱮᱱ ᱫᱟᱲᱮᱭᱟᱜ ᱢᱟ ᱢᱮᱱᱛᱮ | ᱱᱚᱝᱠᱟᱨᱮ ᱯᱟᱠᱚᱲ ᱦᱟᱛᱟᱝ ᱟᱱ ᱦᱚᱲᱠᱚ, ᱥᱟᱱᱛᱟᱲᱟᱜ ᱫᱷᱚᱨᱚᱢ ᱤᱫᱤ ᱠᱟᱛᱮ ᱠᱟᱹᱡ ᱩᱭᱦᱟᱹᱨ ᱟᱹᱰᱤ ᱜᱮ ᱡᱟᱹᱨᱩᱲᱚᱜ ᱠᱟᱱᱟ |

            ᱤᱱᱟᱹᱜ ᱜᱟᱱ ᱥᱮᱪᱮᱫ ᱥᱮᱭᱟᱱ ᱠᱚ ᱱᱚᱶᱟ ᱠᱟᱛᱷᱟ ᱠᱚ ᱟᱸᱜᱚᱪ ᱮᱫᱟ ᱡᱮ ᱥᱟᱱᱛᱟᱲ ᱫᱚᱠᱚ ᱦᱤᱸᱫᱩ ᱠᱟᱱ ᱜᱮᱭᱟ | ᱚᱡᱮ ᱞᱮᱠᱟᱛᱮ ᱟᱠᱚᱠᱚ ᱢᱮᱱᱟ ᱢᱟᱹᱱᱢᱤ ᱡᱤᱭᱚᱱ ᱨᱮᱭᱟᱜ ᱢᱩᱬ ᱯᱮ ᱜᱷᱚᱴᱚᱱ ᱡᱮᱢᱚᱱ ᱪᱷᱟᱹᱴᱭᱟᱹᱨ, ᱵᱟᱯᱞᱟ ᱟᱨ ᱵᱷᱟᱸᱰᱟᱱ ᱨᱮ ᱦᱤᱸᱫᱩ ᱪᱷᱟᱯ ᱵᱤᱥᱛᱤᱭᱟᱱᱟ | ᱟᱠᱚ ᱞᱮᱠᱟᱜᱮ ᱱᱚᱶᱟ ᱠᱟᱹᱢᱤ ᱦᱚᱨᱟ ᱠᱚ ᱥᱟᱶ ᱛᱤᱱᱟᱹᱜ ᱜᱟᱱ ᱫᱤᱠᱩ ᱵᱚᱸᱜᱟ ᱵᱩᱨᱩ ᱦᱚᱸ ᱟᱹᱫᱤᱵᱟᱹᱥᱤ ᱭᱤᱡ ᱠᱟᱱᱟ ᱠᱚ | ᱡᱮᱢᱚᱱ ᱫᱤᱵᱤ ᱢᱟᱺᱭ ᱠᱟᱹᱞᱤ ᱢᱟᱺᱭ ᱞᱩᱠᱷᱤ (ᱞᱚᱠᱷᱢᱤ), ᱫᱩᱨᱜᱟᱹ ᱮᱢᱟᱱ | ᱚᱱᱟ ᱪᱷᱟᱰᱟ ᱥᱚᱦᱨᱟᱭ ᱨᱮ ᱰᱟᱺᱜᱽᱨᱤ ᱵᱚᱸᱜᱟ ᱟᱨ ᱜᱤᱰᱤ ᱪᱩᱢᱟᱹᱣᱬᱟ ᱦᱟᱠᱚ, ᱫᱤᱵᱤ ᱫᱩᱨᱜᱟᱹ ᱧᱩᱛᱩᱢᱛᱮ ᱫᱟᱥᱟᱸᱭ ᱫᱟᱬᱟᱱ ᱟᱨ ᱫᱚᱥᱨᱟ ᱯᱟᱨᱟᱵᱽ ᱨᱮ ᱚᱱᱟ ᱩᱰᱷᱟᱹᱣ ᱮᱢᱟᱱ ᱨᱮᱦᱚᱸ ᱦᱤᱸᱫᱩ ᱫᱷᱚᱨᱚᱢ ᱨᱮᱭᱟᱝ ᱪᱤᱱᱦᱟᱹ ᱧᱟᱢᱚᱜᱼᱟ | ᱡᱟᱣ ᱜᱮᱥᱮ ᱟᱹᱫᱤᱵᱟᱹᱥᱤ ᱠᱚᱫᱚ ᱵᱟᱝ ᱡᱚᱴᱮᱫ ᱡᱟᱹᱛᱤ ᱢᱮᱱ ᱠᱟᱛᱮ ᱢᱩᱸᱫᱤᱨ ᱵᱟᱠᱚ ᱵᱚᱞᱚ ᱚᱪᱚᱣᱟᱜ ᱠᱟᱱ ᱛᱟᱦᱮᱸᱫ | ᱱᱮᱛᱟᱨ ᱢᱟ ᱚᱱᱟ ᱠᱚᱨᱮ ᱦᱚᱸ ᱵᱚᱞᱚᱱ ᱨᱮ ᱢᱟᱱᱟ ᱵᱟᱹᱱᱩᱜᱼᱟ ᱟᱨ ᱚᱱᱰᱮᱱ ᱵᱟᱵᱽᱬᱮ ᱟᱠᱚᱣᱟᱜ ᱛᱤ ᱠᱚᱨᱮᱱ ᱵᱷᱚᱜᱽ ᱥᱟᱢᱟᱱ ᱠᱚ ᱢᱚᱱᱮᱨᱮ ᱠᱩᱪᱤᱛ ᱩᱭᱦᱟᱹᱨ ᱵᱟᱝ ᱫᱚᱦᱚ ᱠᱟᱛᱮ ᱜᱮᱭ ᱵᱚᱸᱜᱟ ᱭᱮᱫᱟ | ᱚᱱᱟᱛᱮ ᱟᱠᱚᱠᱚ ᱢᱮᱱᱟ ᱡᱚᱛᱚ ᱟᱹᱫᱤᱵᱟᱹᱥᱤ ᱠᱚ ᱦᱤᱸᱫᱩ ᱠᱟᱱ ᱜᱮᱭᱟ |

           ᱥᱟᱱᱛᱟᱲᱟᱜ ᱢᱚᱱᱮᱨᱮ ᱵᱟᱨ ᱞᱮᱠᱟᱱ ᱩᱭᱦᱟᱹᱨ ᱱᱤᱛ ᱵᱟᱥᱟ ᱦᱟᱠᱟᱱᱟ | ᱢᱤᱫ ᱫᱚ ᱦᱤᱸᱫᱩ ᱥᱮᱫ, ᱟᱨ ᱢᱤᱫ ᱫᱚ ᱵᱟᱝ ᱥᱮᱫ | ᱚᱠᱟᱴᱟᱝ ᱥᱟᱹᱨᱤᱭᱟ ᱟᱨ ᱚᱠᱟᱫᱚ ᱵᱟᱝ ᱚᱱᱟ ᱤᱫᱤᱠᱟᱛᱮ ᱯᱟᱹᱴᱷᱩᱣᱟᱹ ᱠᱚᱣᱟᱜ ᱫᱤᱥᱟᱹ ᱛᱤᱱᱟᱹᱜ ᱜᱟᱱ ᱡᱤᱱᱤᱥ ᱪᱮᱛᱟᱱ ᱨᱮ ᱱᱚᱱᱰᱮᱧ ᱟᱹᱛᱤᱧ ᱮᱫᱟ |

             ᱡᱚᱛᱚ ᱜᱮᱵᱚ ᱵᱟᱰᱟᱭᱟ, ᱟᱹᱫᱤᱢ ᱡᱩᱜᱽ ᱠᱷᱚᱱ ᱵᱷᱟᱨᱚᱛ ᱫᱤᱥᱚᱢ ᱨᱮ ᱡᱟᱦᱟᱸᱭ ᱠᱚ ᱵᱟᱥᱟᱠᱚ ᱛᱟᱦᱮᱸ ᱠᱟᱱᱟ ᱩᱱᱠᱩᱫᱚ ᱟᱹᱫᱤᱵᱟᱹᱥᱤ ᱠᱚ ᱧᱩᱛᱩᱢ ᱟᱠᱟᱱᱟ | ᱱᱚᱶᱟ ᱚᱛᱮᱛ ᱨᱮ ᱟᱠᱚ ᱥᱩᱠ ᱥᱩᱞᱩᱠ ᱨᱮ ᱫᱤᱱᱠᱚ ᱠᱷᱟᱸᱰᱟᱣ ᱮᱫ ᱛᱟᱦᱮᱸᱫ | ᱢᱮᱱᱠᱷᱟᱱ ᱱᱚᱱᱰᱮᱠᱚ ᱥᱚᱲᱚ ᱵᱚᱞᱚ ᱞᱮᱱᱟ ᱢᱚᱸᱡᱷᱟᱞ ᱮᱥᱤᱭᱟ ᱠᱷᱚᱱ ᱟᱨᱡᱭᱚ,(ᱦᱤᱸᱫᱩ) ᱠᱚ | ᱟᱠᱚᱠᱚ ᱵᱚᱞᱚ ᱞᱮᱱᱟ ᱠᱷᱟᱭᱵᱚᱨ ᱜᱤᱨᱤ ᱥᱚᱝᱠᱚᱴᱚ ᱦᱚᱨᱛᱮ | ᱩᱱᱠᱩ ᱠᱚ ᱛᱟᱦᱮᱸ ᱠᱟᱱᱟ ᱵᱟᱨᱚ ᱵᱩᱞᱟᱹ ᱛᱟᱛᱟᱬᱜᱚᱢ ᱠᱚ᱾ ᱟᱠᱚᱣᱟᱜ ᱦᱚᱲᱢᱚ ᱨᱮᱭᱟᱝ ᱨᱚᱝ ᱮᱥᱮᱞ ᱠᱷᱟᱹᱛᱤᱨ ᱟᱠᱚᱫᱚ ᱢᱩᱬ ᱵᱩᱱᱩᱥᱛᱤ ᱦᱚᱲ ᱠᱷᱚᱱ ᱥᱮᱬᱟᱠᱚ ᱩᱫᱩᱜ ᱮᱱᱟ ᱟᱨ ᱱᱚᱱᱰᱮᱱᱟᱜ ᱥᱩᱞᱩᱠ ᱠᱚ ᱨᱟᱹᱯᱩᱫ ᱠᱮᱫᱟ | ᱫᱷᱚᱱ ᱫᱩᱨᱤᱵᱽ ᱡᱚᱛᱚᱣᱟᱜ ᱠᱚ ᱟᱢᱮᱴ ᱠᱮᱫᱟ᱾ ᱵᱷᱟᱨᱚᱛ ᱨᱮᱭᱟᱝ ᱩᱛᱚᱨ ᱟᱨ ᱯᱩᱪᱷᱤᱢ ᱨᱮ ᱟᱠᱚ ᱴᱷᱟᱶ ᱠᱟᱛᱮ ᱢᱟᱬᱟᱝ ᱠᱚᱫᱚᱠᱚ ᱞᱟᱜᱟ ᱠᱟᱫ ᱠᱚᱣᱟ ᱫᱩᱠᱷᱤᱱ ᱢᱚᱸᱦᱰᱟ | ᱢᱟᱬᱟᱝ ᱟᱹᱫᱤᱵᱟᱹᱥᱤ ᱠᱚᱢᱟ ᱡᱚᱛᱚᱣᱟᱜ ᱛᱮ ᱫᱚᱲᱦᱚ ᱠᱚ ᱛᱟᱦᱮᱸᱠᱟᱱᱟ ᱢᱮᱱᱠᱷᱟᱱ, ᱦᱮᱨᱟᱣ ᱚᱪᱚ ᱠᱟᱛᱮᱫ ᱟᱹᱰᱤᱠᱚ ᱡᱟᱸᱫᱮ ᱛᱟᱸᱫᱮ ᱭᱮᱱᱟ᱾ ᱯᱚᱱᱰᱤᱛ ᱱᱮᱦᱨᱩ ᱛᱤᱠᱤᱱ “ᱦᱤᱸᱫᱩᱥᱛᱟᱱ ᱠᱤ ᱠᱟᱦᱟᱱᱤ” ᱨᱮᱠᱤᱱ ᱚᱞ ᱟᱠᱟᱫᱟ ᱼ ᱟᱨᱡᱭᱚ ᱨᱚᱲ ᱫᱚ ‘ᱚᱨ’ ᱫᱷᱟᱛᱩ ᱠᱷᱚᱱ ᱦᱮᱡ ᱟᱠᱟᱱᱟ᱾ ᱟᱹᱠᱤᱱᱟᱜ ᱢᱮᱱ ᱞᱮᱠᱟ ᱛᱮ ‘ᱨᱚ’ ᱢᱟᱱᱮ ᱫᱚ ‘ᱱᱟᱦᱮᱞ’ | ᱚᱛ ᱦᱟᱥᱟ ᱨᱮᱡ ᱠᱟᱛᱮ ᱟᱠᱚᱣᱟᱜ ᱱᱟᱦᱮᱞ ᱪᱟᱞᱟᱣ ᱡᱟᱹᱛᱤ ᱠᱟᱱᱟᱠᱚ, ᱚᱱᱟᱛᱮ ᱟᱨᱡᱭᱚ | ᱮᱴᱟᱜ ᱠᱚ ᱪᱮᱛᱟᱱ ᱨᱮ ᱡᱚᱵᱚᱨ ᱛᱮ ᱟᱹᱭᱫᱟᱹᱨ ᱞᱟᱫᱮᱭᱤᱡ ᱠᱟᱱᱟ ᱠᱚ᱾ ᱚᱱᱠᱟᱜᱮ ᱟᱭᱟᱨ ᱨᱟᱥᱴᱨᱚᱯᱚᱛᱤ ᱥᱚᱨᱵᱚ ᱯᱚᱞᱤ ᱨᱟᱫᱷᱟ ᱠᱨᱩᱥᱱᱚᱱ ᱛᱤᱠᱤᱱ “ᱤᱥᱴᱚᱨᱱ ᱨᱤᱞᱤᱡᱤᱭᱚᱱ ᱣᱮᱥᱴᱚᱨᱱ ᱛᱷᱚᱴ” ᱨᱮᱠᱤᱱ ᱚᱞ ᱟᱠᱟᱫᱟ ᱼ ᱢᱟᱬᱟᱝ ᱟᱨᱡᱭᱚ ᱠᱚᱣᱟᱜ ᱫᱚ ᱥᱚᱥᱱᱚᱜ ᱢᱮᱱᱛᱮ ᱪᱮᱫ ᱡᱤᱱᱤᱥ ᱜᱮ ᱵᱟᱭ ᱛᱟᱦᱮᱸ ᱠᱟᱱᱟ | ᱨᱮᱡ ᱨᱮᱯᱮᱡ ᱜᱮᱠᱚ ᱵᱟᱰᱟᱭ ᱞᱮᱫᱟ ᱟᱨ ᱥᱚᱥᱱᱚᱜ ᱫᱚ ᱟᱹᱫᱤᱵᱟᱹᱥᱤ ᱴᱷᱮᱫ ᱠᱷᱚᱱ ᱪᱮᱫ ᱠᱟᱛᱮ ᱥᱩᱥᱟᱹᱨ ᱞᱮᱱᱟᱠᱚ | ᱟᱹᱫᱤᱵᱟᱹᱥᱤ ᱢᱟ ᱪᱷᱚᱞ ᱵᱟᱠᱚ ᱵᱟᱰᱟᱭ ᱞᱮᱫᱟ ᱟᱨᱡᱭᱚ ᱠᱚᱣᱟᱜ ᱪᱷᱚᱞ ᱛᱮ ᱥᱮᱠᱞᱟᱸᱫ ᱠᱟᱛᱮ ᱵᱩᱨᱩ ᱵᱷᱤᱛᱟᱹᱨ ᱠᱚ ᱵᱚᱞᱚ ᱞᱮᱱᱟ |

                 ᱱᱚᱶᱟ ᱠᱚᱨᱮ ᱠᱷᱚᱱ ᱵᱟᱨᱭᱟ ᱥᱚᱥᱱᱚᱜᱟᱜ ᱯᱚᱨᱢᱟᱬ ᱧᱟᱢᱚᱜ ᱠᱟᱱᱟ | ᱢᱤᱫᱴᱟᱝ ᱫᱚ ᱢᱟᱬᱟᱝ ᱛᱮᱭᱟᱜ ᱟᱨ ᱢᱤᱫᱴᱟᱝ ᱫᱚ ᱦᱮᱡ ᱵᱚᱞᱚᱣᱟᱜ | ᱢᱟᱬᱟᱝ ᱛᱤᱱᱠᱚ ᱟᱨ ᱛᱟᱭᱚᱢ ᱛᱤᱱᱠᱚ ᱡᱚᱛᱚ ᱡᱩᱫᱤᱠᱚ ᱟᱨᱡᱭᱚ ᱠᱟᱱᱟ, ᱦᱤᱸᱫᱩ ᱠᱟᱱᱟᱠᱚ, ᱮᱱᱠᱷᱟᱱ ᱟᱵᱚᱫᱚ ᱚᱠᱟ ᱞᱮᱠᱟᱨᱮᱵᱚ ᱱᱤᱫᱷᱟᱹᱱ ᱟᱨ ᱫᱷᱚᱨᱚᱢ ᱵᱟᱹᱱᱩᱜ ᱟᱹᱫᱤᱵᱟᱹᱥᱤᱜᱼᱟ?

                ᱱᱚᱶᱟ ᱛᱩᱞᱩᱡ ᱦᱚᱸ ᱡᱟᱦᱟᱸᱭ ᱠᱚᱠᱚ ᱢᱮᱱᱮᱜᱼᱟ ᱟᱹᱫᱤᱵᱟᱹᱥᱤ ᱫᱚ ᱦᱤᱸᱫᱩᱜᱮ, ᱮᱱᱠᱷᱟᱱ ᱢᱟ ᱞᱟᱹᱭᱢᱟᱠᱚ ᱦᱤᱸᱫᱩ ᱫᱷᱚᱨᱢᱚ ᱦᱤᱥᱟᱹᱵᱽ ᱟᱵᱚᱫᱚ ᱚᱠᱟ ᱵᱚᱨᱱᱚᱨᱤᱱ? ᱜᱤᱛᱟᱹᱨᱮ ᱥᱨᱤᱠᱨᱩᱥᱱᱚᱭ ᱢᱮᱱ ᱟᱠᱟᱫᱟ ᱯᱩᱱᱭᱟᱹ ᱵᱚᱨᱱᱚ ᱫᱚ ᱤᱧᱤᱧ ᱥᱤᱨᱡᱟᱹᱣ ᱟᱠᱟᱫᱟ | ᱪᱟᱛᱩᱨᱵᱚᱬᱭᱚᱢ ᱢᱟᱢᱟ ᱠᱷᱩᱠᱴᱚᱢ ᱜᱩᱬᱚ ᱠᱚᱨᱢᱚ ᱵᱤᱵᱷᱟᱜᱚ ᱠᱚ | ᱵᱚᱨᱱᱚ ᱤᱧᱤᱧ ᱥᱤᱨᱡᱟᱹᱣ ᱟᱠᱟᱫᱟ | ᱚᱱᱟᱠᱚᱫᱚ ᱦᱩᱭᱩᱜ ᱠᱟᱱᱟ ᱵᱨᱟᱢᱦᱚᱬᱚ, ᱠᱷᱭᱚᱛᱨᱤᱭᱚ, ᱵᱚᱭᱥᱭᱚ ᱟᱨ ᱥᱩᱫᱽᱨᱚ |

               ᱵᱟᱵᱽᱬᱮ ᱠᱚ ᱵᱚᱸᱜᱟᱭᱟ, ᱠᱷᱭᱚᱛᱨᱤᱭᱚ ᱠᱚ ᱫᱮᱥ ᱠᱚ ᱫᱩᱜᱟ, ᱞᱟᱹᱲᱦᱟᱹᱭ ᱠᱟᱛᱮ ᱵᱚᱭᱥᱭᱚ ᱠᱚ ᱵᱮᱯᱟᱨᱟ ᱟᱨ ᱥᱩᱫᱽᱨᱚ ᱫᱚ ᱪᱮᱛᱟᱱ ᱨᱤᱱ ᱠᱚᱣᱟᱜ ᱠᱚ ᱥᱮᱵᱟᱭᱟ | ᱦᱤᱸᱫᱩ ᱫᱷᱚᱨᱚᱢ ᱨᱤᱱ ᱡᱚᱛᱚ ᱦᱚᱲᱟᱜ ᱠᱟᱹᱢᱤ ᱱᱚᱸᱰᱮ ᱦᱟᱹᱴᱤᱧ ᱟᱠᱟᱱᱟ | ᱥᱟᱱᱛᱟᱲ ᱫᱚ ᱱᱤᱛ ᱥᱩᱫᱽᱨᱚ ᱠᱚ ᱢᱮᱛᱟ ᱦᱟᱠᱚ ᱠᱟᱱᱟ | ᱢᱟ ᱛᱚᱵᱮ ᱫᱚ ᱞᱟᱹᱭᱢᱟ ᱚᱠᱚᱭ ᱠᱚ ᱥᱮᱵᱟᱭᱮᱫ ᱠᱚᱣᱟ ᱥᱟᱱᱛᱟᱲ ᱫᱚ? ᱯᱮᱬᱮ ᱠᱟᱛᱮ ᱦᱚᱲ ᱞᱩᱜᱽᱲᱤ ᱠᱚ ᱛᱮᱧ ᱟᱠᱚ ᱠᱟᱱᱟ ᱪᱤ ᱜᱷᱟᱹᱥᱤ ᱠᱟᱛᱮ ᱯᱷᱟᱨᱪᱟ ᱯᱷᱟᱹᱨᱪᱤ ᱭᱟᱠᱚ ᱠᱟᱱᱟᱠᱚ ᱪᱤ ᱫᱷᱚᱵᱟ ᱠᱟᱛᱮ ᱞᱩᱜᱽᱲᱤᱠᱚ ᱥᱚᱵᱚᱫ ᱟᱠᱚ ᱠᱟᱱᱟ ᱪᱤ ᱦᱚᱲᱠᱚ ᱦᱚᱭᱚ ᱢᱩᱸᱰᱨᱟᱹᱭᱮᱫ ᱠᱚᱣᱟ? ᱯᱮᱥᱟ ᱪᱤᱛᱟᱹᱨᱛᱟ ᱠᱟᱹᱢᱤ ᱠᱟᱱᱟᱠᱚ, ᱡᱚᱛᱟᱠᱚ ᱵᱮᱱᱟᱣ ᱮᱫᱟ ᱢᱟ ᱪᱟᱥ ᱵᱟᱥ, ᱥᱮᱸᱫᱽᱨᱟ ᱠᱟᱨᱠᱟ | ᱵᱟᱹᱱᱩᱜ ᱠᱚᱣᱟ ᱵᱚᱭᱦᱟ ᱯᱩᱱ ᱵᱚᱨᱱᱚ ᱨᱮᱫᱚ, ᱟᱨ ᱵᱟᱝ ᱠᱟᱱ ᱜᱮᱭᱟ ᱠᱚ ᱦᱤᱸᱫᱩ |

           ᱡᱟᱦᱟᱸᱭ ᱠᱚᱠᱚ ᱢᱮᱱᱮᱜᱼᱟ ᱢᱩᱬ ᱯᱮ ᱜᱷᱚᱴᱚᱱ ᱦᱤᱸᱫᱩ ᱨᱮᱭᱟᱝ ᱞᱮᱠᱟᱛᱮ ᱟᱵᱚᱫᱚ ᱦᱤᱸᱫᱩ ᱜᱮ, ᱩᱱᱠᱩ ᱦᱚᱸ ᱵᱚᱞᱚᱜ ᱢᱟᱵᱚ ᱜᱟᱹᱦᱤᱨ ᱛᱮ ᱡᱟᱹᱛᱤ ᱨᱮᱭᱟᱜ ᱞᱮᱜᱽᱪᱟᱨ ᱵᱷᱤᱛᱟᱹᱨ | ᱪᱷᱩᱛ ᱨᱮ ᱟᱛᱱᱟᱜ ᱥᱟᱠᱟᱢ ᱛᱮ ᱡᱟᱹᱛᱤᱜ ᱟᱨ ᱵᱷᱟᱱᱰᱟᱱᱨᱮ ᱱᱟᱲᱠᱟ ᱦᱟᱥᱟ ᱥᱩᱱᱩᱢ ᱠᱟᱲᱮ ᱫᱟᱜ ᱨᱮ ᱵᱚᱸᱜᱟ ᱟᱬᱜᱚᱭ, ᱢᱟᱥᱮ ᱚᱠᱟ ᱦᱤᱸᱫᱩ ᱫᱷᱚᱨᱚᱢ ᱨᱮ ᱢᱮᱱᱟᱜᱼᱟ ᱞᱟᱹᱭ ᱛᱟᱵᱚᱱ ᱯᱮ | ᱫᱷᱟᱺᱭ ᱵᱩᱰᱷᱤ ᱠᱚ ᱠᱷᱚᱡᱚᱜᱼᱟ ᱱᱚᱶᱟ ᱠᱚᱨᱮ, ᱵᱟᱨᱤᱠᱚ ᱠᱚ ᱠᱷᱚᱡᱚᱼᱟ ᱡᱟᱹᱛ ᱠᱷᱚᱱ ᱜᱮ | ᱵᱷᱟᱱᱰᱟᱱ ᱨᱮ ᱠᱟᱸᱛ ᱠᱟᱹᱴᱷᱤ ᱥᱮᱱᱚᱜ ᱠᱚ ᱵᱟᱵᱷᱚᱱ ᱵᱩᱥᱴᱚᱢ ᱧᱩᱛᱩᱢ ᱛᱮ ᱯᱷᱟᱹᱲᱤ ᱡᱤᱞ, ᱦᱩᱸᱰᱟᱹ ᱡᱤᱞ, ᱴᱩᱝᱠᱤ ᱪᱟᱣᱞᱮ ᱠᱚ ᱪᱟᱞ ᱟᱠᱚᱣᱟ | ᱱᱚᱶᱟ ᱫᱚ ᱦᱤᱸᱫᱩ ᱫᱷᱚᱨᱚᱢ ᱯᱟᱸᱡᱟ ᱠᱟᱛᱮᱫᱚ ᱵᱟᱝ ᱵᱤᱪᱠᱚᱢ ᱩᱱᱠᱩ ᱵᱚᱞᱚ ᱦᱮᱡ ᱞᱮᱱ ᱪᱷᱩᱞᱤᱭᱟᱹ ᱠᱚᱦᱚᱸ ᱱᱚᱝᱠᱟᱱ ᱚᱠᱛᱚ ᱨᱮ ᱥᱟᱹᱜᱩᱱ ᱵᱷᱟᱹᱵᱤ ᱠᱟᱛᱮ ᱟᱹᱥ ᱢᱟᱨᱟᱣ, ᱯᱤᱲᱦᱟᱹ ᱠᱷᱟᱸᱰᱟᱣ ᱞᱟᱹᱜᱤᱫ ᱩᱱ ᱵᱮᱲᱟ ᱠᱷᱚᱱ ᱜᱮ ᱫᱟᱱ ᱮᱢᱠᱚ ᱮᱦᱚᱵ ᱟᱠᱟᱫᱟ | ᱟᱨᱡᱭᱚᱠᱚ ᱟᱵᱚᱣᱟᱜ ᱚᱱᱟ ᱮᱢ ᱠᱷᱚᱱ ᱜᱮ ᱯᱟᱸᱡᱟ ᱠᱟᱛᱮ ᱞᱮᱛᱟᱲ ᱤᱫᱤ ᱠᱷᱟᱹᱛᱤᱨ ᱚᱱᱠᱟᱱᱟᱜ ᱩᱭᱦᱟᱹᱨ ᱠᱚ ᱜᱟᱫᱟᱨ ᱞᱮᱫᱟ ᱟᱨ ᱚᱱᱟ ᱞᱮᱠᱟᱛᱮ ᱯᱚᱛᱚᱵ ᱯᱩᱛᱷᱤ ᱠᱚ ᱚᱞ ᱞᱮᱫᱟ | ᱚᱱᱠᱟᱪᱤ ᱢᱟᱬᱟᱝ ᱛᱮᱭᱟᱜ ᱯᱚᱛᱚᱵ ᱯᱩᱛᱷᱤ ᱦᱚᱸ ᱟᱹᱨᱩ ᱯᱷᱮᱨᱟᱣ ᱠᱟᱛᱮ ᱦᱚᱲᱠᱚ ᱜᱷᱟᱹᱨᱩ ᱜᱷᱟᱹᱱᱴᱩ ᱞᱮᱫ ᱵᱚᱣᱟ | ᱥᱟᱶᱦᱮᱫ ᱨᱮ ᱯᱩᱱᱭᱟᱹ ᱵᱮᱫᱚ ᱢᱮᱱᱟᱜᱼᱟ | ᱨᱩᱠᱡᱚᱡᱩᱦᱥᱟᱢ ᱟᱨ ᱚᱛᱷᱚᱨᱵᱚ | ᱚᱞ ᱵᱟᱭ ᱮᱛᱚᱦᱚᱵ ᱞᱮᱱᱛᱮ ᱢᱟᱬᱟᱝ ᱟᱸᱡᱚᱢ ᱠᱟᱛᱷᱟ ᱠᱚ ᱵᱮᱫᱚ ᱨᱮᱫᱚ ᱢᱮᱱᱟᱜᱼᱟ | ᱮᱛᱚᱦᱚᱵ ᱵᱮᱫᱚ ᱨᱩᱠ ᱵᱮᱫᱚ ᱫᱚ ᱟᱨᱡᱭᱚᱠᱚ ᱦᱤᱡᱩᱜ ᱢᱟᱬᱟᱝ ᱛᱮᱭᱟᱜ ᱠᱟᱱᱟ᱾ ᱚᱱᱟᱫᱚ ᱵᱷᱟᱨᱚᱛ ᱨᱤᱱ ᱮᱛᱚᱦᱚᱵ ᱦᱚᱲ ᱢᱮᱱᱚᱜᱚᱜ ᱠᱟᱱ ᱠᱩᱨᱢᱚ ᱠᱚᱥᱭᱚᱯᱚ ᱚᱞ ᱞᱮᱫᱟᱭ | ᱚᱸᱰᱮᱱᱟᱜ ᱟᱹᱰᱤᱜᱟᱱ ᱚᱱᱚᱞ ᱫᱚ ᱮᱥᱮᱞ ᱦᱟᱨᱟᱛᱟ ᱦᱟᱱ ᱵᱟᱵᱽᱬᱮ ᱠᱚ ᱚᱪᱚᱜ ᱜᱤᱰᱤ ᱟᱠᱟᱜᱼᱟ | ᱡᱚᱥ ᱛᱟᱠᱚ ᱫᱚ ᱤᱱᱟᱹᱜᱮ, ᱡᱮᱢᱚᱱ ᱮᱴᱟᱜ ᱠᱚ ᱟᱠᱚᱠᱚ ᱢᱟᱹᱱ ᱟᱠᱚᱢᱟ | ᱵᱟᱝᱠᱷᱟᱱ ᱨᱩᱠ ᱵᱮᱫᱚ ᱨᱮᱢᱟ ᱚᱨ (ᱥᱤ) ᱟᱨᱡᱟᱣ ᱯᱟᱹᱭᱴᱤ ᱫᱚ ᱥᱚᱱᱚᱛ ᱯᱟᱹᱭᱴᱤ ᱠᱟᱱᱟ ᱢᱮᱱᱛᱮ ᱩᱨᱩᱢ ᱞᱮᱱᱟ ᱟᱨ ᱪᱟᱹᱥᱤ ᱠᱚᱫᱚ ᱥᱟᱶᱛᱟᱨᱮ ᱡᱚᱛᱚ ᱠᱷᱚᱱ ᱢᱟᱹᱱᱟᱱ ᱦᱚᱲᱠᱚ ᱛᱟᱦᱮᱸ ᱠᱟᱱᱟ᱾ ᱚᱱᱠᱟᱜᱮ ᱵᱚᱸᱜᱟ ᱵᱩᱨᱩ ᱯᱟᱹᱛᱭᱟᱹᱣ ᱫᱚ ᱟᱹᱫᱤᱵᱟᱹᱥᱤ ᱴᱷᱮᱱ ᱠᱷᱚᱱ ᱮᱛᱚᱦᱚᱵ ᱟᱠᱟᱱᱟ | ᱥᱮᱫᱟᱭ ᱫᱚ ᱵᱷᱟᱨᱚᱛ ᱛᱟᱦᱮᱸ ᱠᱟᱱᱟ ᱟᱹᱰᱤ ᱢᱟᱨᱟᱝ ᱫᱤᱥᱚᱢ | ᱚᱱᱰᱮᱱᱤᱡ ᱦᱚᱲᱜᱮ ᱵᱚᱸᱜᱟ ᱵᱩᱨᱩ ᱨᱮᱫᱚ ᱯᱟᱹᱛᱭᱟᱹᱣ ᱛᱟᱠᱚ᱾ ᱦᱮᱡ ᱢᱮᱥᱟᱭᱤᱡ ᱫᱚ ᱢᱟᱬᱟᱝ ᱠᱚ ᱴᱷᱮᱫ ᱠᱷᱚᱱ ᱜᱮ ᱱᱤᱥᱴᱟᱹ ᱛᱟᱦᱮᱸᱱ, ᱩᱯᱟᱹᱥ ᱛᱟᱦᱮᱸᱱ ᱠᱷᱚᱱ ᱮᱦᱚᱵ ᱠᱟᱛᱮ ᱥᱟᱱᱟᱢ ᱨᱟᱭ ᱨᱤᱛᱠᱚ ᱦᱟᱛᱟᱣ ᱞᱮᱫᱟ ᱢᱮᱱᱛᱮ ᱜᱟᱹᱠᱷᱩᱲ ᱚᱱᱚᱞᱤᱭᱟᱹ ᱠᱚᱠᱚ ᱥᱩᱠᱟᱨ ᱟᱠᱟᱫᱟ |ᱱᱚᱶᱟ ᱠᱚ ᱢᱩᱸᱫᱨᱮ ᱢᱟᱹᱱᱤᱡ ᱫ ᱚᱢᱚᱭ ᱚᱱᱛᱤ ᱵᱮᱥᱨᱟ ᱛᱤᱠᱤᱱ ᱟ ᱹᱠᱤᱱᱟ ᱜ ᱛᱷᱮᱥᱤᱥ ᱢᱚᱭᱩᱨᱵᱷᱚᱸᱡᱚᱨᱚ ᱥᱟᱱᱛᱟᱲᱚ ᱮᱠᱚ ᱥᱟᱢᱟᱡᱤᱠᱚ ᱥᱟᱸᱥᱠᱨᱩᱛᱤᱠᱚ ᱚᱫᱷᱭᱚᱭᱚᱱᱚ” ᱨᱮ ᱟᱹᱰᱤᱜᱟᱱ ᱯᱚᱨᱢᱟᱬ ᱠᱤᱱ ᱮᱢ ᱟᱠᱟᱫᱟ, ᱟᱨ ᱠᱤᱱ ᱢᱮᱱ ᱟᱠᱟᱫᱟ ᱡᱮ ᱱᱤᱛᱚᱜᱤᱡ ᱡᱚᱜᱚᱨᱱᱟᱛᱷᱚ, ᱵᱚᱲᱚᱵᱷᱚᱫᱽᱨᱚ ᱟᱨ ᱥᱩᱵᱷᱚᱫᱨᱟ ᱦᱚᱸ ᱢᱟᱨᱟᱝ ᱵᱩᱨᱩ ᱡᱟᱦᱮᱨ ᱮᱨᱟ ᱟᱨ ᱢᱚᱬᱮᱠᱚᱣᱟᱜ ᱵᱚᱫᱚᱞ ᱨᱩᱯ ᱠᱟᱱᱟ᱾ ᱪᱮᱫᱟᱜ ᱪᱤ ᱱᱤᱛᱚᱜ ᱫᱷᱟᱹᱵᱤᱡ ᱢᱟᱱᱟᱣ ᱟᱹᱜᱩ ᱟᱠᱟᱫ ᱠᱟᱛᱷᱟ ᱞᱮᱠᱟᱛᱮ ᱡᱚᱜᱚᱨᱱᱟᱛᱷᱚ ᱫᱚ ᱥᱚᱵᱚᱨ ᱠᱚᱨᱤᱱ “ᱡᱚᱜᱚᱨᱱᱟᱛᱷᱚ” ᱠᱟᱱ ᱠᱷᱟᱱᱮ ᱥᱩᱵᱷᱚᱫᱨᱟ ᱟᱨ ᱚᱲᱚᱵᱷᱚᱫᱽᱨᱚ ᱫᱚᱠᱤᱱ ᱚᱠᱚᱭ ᱠᱟᱱᱟ? ᱢᱤᱫᱴᱟᱹᱝ ᱴᱷᱟᱶᱨᱮ ᱱᱚᱝᱠᱟᱱ ᱯᱮᱭᱟ ᱵᱚᱸᱜᱟ ᱵᱚᱸᱜᱟᱦᱟᱠᱚ ᱪᱮᱞᱚᱱ ᱫᱚ ᱥᱟᱱᱛᱟᱲᱟᱜ ᱥᱩᱢᱩᱝᱜᱮ | ᱚᱱᱠᱟᱜᱮ ᱢᱟᱨᱟᱝ ᱵᱚᱸᱜᱟ ᱢᱟᱨᱟᱝ ᱵᱩᱨᱩ ᱟᱵᱚᱵᱚᱱ ᱵᱚᱸᱜᱟ ᱦᱟᱭ ᱠᱷᱟᱹᱛᱤᱨ ᱛᱟᱛᱟᱬᱚᱢ ᱟᱨᱡᱭᱚ ᱠᱚ ᱥᱮᱬᱟ ᱵᱩᱨᱩ ᱢᱮᱱᱮᱫ ᱦᱤᱢᱟᱲᱚᱭᱚ ᱪᱮᱛᱟᱱᱨᱮ ᱟᱵᱚᱣᱟᱜ ᱯᱟᱹᱛᱭᱟᱹᱣ ᱫᱟᱵᱚᱱ ᱞᱟᱹᱜᱤᱫ ᱢᱚᱦᱟᱫᱮᱵᱚᱠᱚ ᱴᱷᱟᱶ ᱠᱮᱫᱮᱭᱟ |

        ᱦᱤᱸᱫᱩ ᱫᱷᱚᱨᱚᱢ ᱨᱮᱭᱟᱝ ᱠᱟ ᱭ ᱫᱟ ᱠᱟᱹᱱᱩᱱ ᱵᱮᱸᱜᱮᱫᱟᱜ ᱨᱮᱦᱚᱸ ᱥᱟᱱᱛᱟᱲ ᱫᱚ ᱦᱤᱸᱫᱩ ᱫᱚᱠᱚ ᱵᱟᱝ ᱠᱟᱱᱟ ᱢᱚᱱᱛᱮ ᱵᱟᱰᱟᱭᱚᱜᱼᱟ ᱾ ᱵᱷᱟᱨᱚᱛ ᱫᱤᱥᱚᱢᱨᱮ ᱦᱤᱸᱫᱩ, ᱢᱩᱥᱚᱞᱢᱟᱱ ᱟᱨ ᱤᱥᱟᱹᱭ ᱠᱚᱣᱟᱜ ᱡᱮ ᱡᱷᱟᱨ ᱡᱟᱹᱛᱤᱭᱟᱹᱨᱤ ᱟᱵᱽᱜᱮ ᱵᱟᱹᱭᱥᱤ (Personal Law) ᱢᱮᱱᱟᱜᱼᱟ | ᱡᱮᱢᱚᱱ ᱦᱤᱸᱫᱩ ᱟᱵᱽᱜᱮ ᱵᱟᱹᱭᱥᱤ (Hindu Personal Law) ᱯᱟᱴᱷᱟᱬ ᱡᱟᱹᱛᱤᱭᱟᱹᱨᱤ ᱟᱵᱽᱜᱮ ᱵᱟᱹᱭᱥᱤ (Mohammedan Personal Law) ᱮᱢᱟᱱ | ᱦᱤᱸᱫᱩ ᱟᱵᱽᱜᱮ ᱵᱟᱹᱭᱥᱤ ᱑᱙᱒᱖ ᱨᱮ ᱢᱮᱱᱟᱜᱼᱟ ᱵᱟᱯᱞᱟ ᱠᱟᱹᱱᱩᱱ, ᱟᱹᱥᱩᱞ ᱦᱚᱯᱚᱱ ᱟᱨ ᱟᱹᱯᱟᱹᱥᱩᱞ ᱠᱟᱹᱱᱩᱱ, ᱚᱣᱟᱨᱤᱥ ᱠᱟᱹᱱᱩᱱ, ᱱᱟᱵᱟᱞᱚᱠ ᱟᱨ ᱢᱩᱨᱚᱵᱤ ᱠᱟᱹᱱᱩᱱ ᱮᱢᱟᱱ | ᱛᱚᱵᱮ ᱱᱚᱶᱟ ᱠᱚᱫᱚ ᱟᱹᱫᱤᱵᱟᱹᱥᱤ ᱞᱟᱹᱜᱤᱫ ᱫᱚ ᱵᱟᱭ ᱞᱟᱹᱜᱩᱜᱼᱟ ᱢᱮᱱᱛᱮ ᱞᱟᱹᱭ ᱴᱷᱟᱹᱣᱠᱟᱹ ᱦᱟᱠᱟᱱᱟ | ᱚᱱᱟ ᱪᱷᱟᱰᱟ ᱥᱚᱢᱵᱤᱫᱷᱟᱱ ᱨᱮᱭᱟᱝ ᱒᱕ ᱫᱷᱟᱯᱨᱮ ᱫᱷᱚᱨᱚᱢ ᱨᱮᱭᱟᱝ ᱟᱹᱭᱫᱟᱹᱨᱤ ᱤᱫᱤᱠᱟᱛᱮ ᱚᱞ ᱢᱮᱱᱟᱜᱼᱟ | ᱚᱱᱰᱮ ᱦᱚᱸ ᱵᱚᱣᱫᱷᱚ ᱥᱤᱠᱷ ᱮᱢᱟᱱ ᱫᱚ ᱦᱤᱸᱫᱩ ᱢᱮᱱᱛᱮ ᱚᱞ ᱟᱠᱟᱱᱟ ᱤᱠᱷᱟᱹᱱ, ᱟᱹᱫᱤᱵᱟᱹᱥᱤ ᱤᱫᱤ ᱠᱟᱛᱮ ᱫᱚ ᱦᱟᱹᱯᱤ ᱜᱮᱭᱟ |

         ᱢᱟᱹᱱᱢᱤ ᱦᱚᱯᱚᱱ ᱟᱡᱟᱜ ᱱᱤᱛᱚᱜᱟᱜ ᱟᱨ ᱫᱷᱤᱱᱟᱹᱝ ᱟᱜ ᱡᱤᱭᱚᱱ ᱛᱟᱭ ᱥᱟᱶᱟᱨ ᱞᱟᱹᱜᱤᱫ ᱡᱟᱦᱟᱸ ᱦᱚᱨ ᱰᱟᱦᱟᱨ ᱮ ᱥᱟᱵᱟ ᱚᱱᱟᱜᱮ ᱫᱷᱚᱨᱚᱢ ᱫᱚ | ᱦᱤᱸᱫᱩ ᱫᱷᱚᱨᱚᱢ ᱨᱤᱱ ᱠᱚᱫᱚ ᱮᱠᱞᱟ ᱜᱮ ᱮᱢᱟᱱ ᱛᱮᱢᱟᱱ ᱵᱚᱸᱜᱟ ᱛᱟᱠᱚ ᱱᱩᱬᱭᱟᱹ ᱠᱟᱭᱨᱟ ᱠᱚ ᱵᱚᱸᱜᱟ ᱦᱟᱠᱚᱣᱟ | ᱟᱵᱚ ᱫᱚ ᱡᱚᱛᱚ ᱜᱮ ᱢᱟᱭᱟᱝ ᱵᱚ ᱡᱚᱨᱚ ᱟᱠᱚᱣᱟ | ᱜᱚᱡ ᱠᱟᱛᱮ ᱡᱤᱣᱤ ᱥᱚᱨᱚᱜᱨᱮ ᱴᱷᱟᱶ ᱮ ᱧᱟᱢ ᱢᱟ ᱢᱮᱱᱛᱮ  ᱟᱠᱚᱠᱚ ᱠᱷᱚᱡᱽ ᱵᱮᱲᱟᱨᱮ, ᱟᱵᱚᱫᱚ ᱩᱢᱩᱞ ᱵᱚ ᱟᱫᱮᱨᱟ ᱟᱨ ᱦᱟᱯᱲᱟᱢᱠᱚ ᱛᱩᱞᱩᱡ ᱠᱟᱜ ᱟᱵᱚ | ᱥᱟᱱᱛᱟᱲᱟᱜ ᱚᱲᱟᱜ ᱦᱚᱸ ᱡᱤᱣᱤᱫ ᱦᱚᱲ ᱥᱩᱢᱩᱝ ᱞᱟᱹᱜᱤᱫ ᱜᱮ ᱵᱟᱝᱠᱟᱱᱟ | ᱚᱸᱰᱮ ᱠᱟᱸᱫᱷᱟ ᱠᱟᱛᱮ ᱵᱟᱨ ᱦᱟᱹᱴᱤᱧ ᱠᱟᱜᱼᱟᱠᱚ ᱟᱨ ᱢᱤᱫ ᱠᱮᱪᱟᱜ ᱵᱷᱤᱛᱟᱹᱨ ᱧᱩᱛᱩᱢ ᱛᱮ ᱟᱠᱚᱵᱚ ᱟᱲᱟᱜ ᱟᱠᱚ ᱠᱟᱱᱟ | ᱱᱚᱝᱠᱟᱱ ᱩᱭᱦᱟᱹᱨ ᱯᱟᱞᱮ ᱮᱴᱟᱜ ᱡᱟᱹᱛᱤ ᱨᱮᱫᱚ ᱵᱟᱹᱱᱩᱜᱼᱟ | ᱫᱟᱠᱟ ᱡᱚᱢ ᱵᱮᱲᱟ ᱟᱠᱚ ᱧᱩᱛᱩᱢᱛᱮ ᱫᱤᱱᱟᱹᱢ ᱠᱟᱹᱡ ᱪᱩᱨᱩᱡᱽ ᱠᱷᱟᱹᱛᱤᱨ ᱢᱩᱱᱫᱤᱨ ᱠᱚ ᱥᱮᱱᱚᱜ ᱫᱚ ᱵᱟᱭ ᱞᱟᱹᱠᱛᱤ ᱟ |

     ᱯᱤᱞᱪᱩ ᱦᱟᱲᱟᱢ ᱟᱨ ᱯᱤᱞᱪᱩ ᱵᱩᱰᱷᱤ ᱮᱭᱟᱭ ᱦᱚᱯᱚᱱ ᱮᱭᱟᱭ ᱦᱚᱯᱚᱱ ᱮᱨᱟᱠᱚ ᱦᱩᱭᱮᱱ ᱠᱷᱟᱱ ᱡᱮᱡᱷᱟᱨ ᱞᱮᱫ ᱠᱚᱣᱟᱠᱤᱱ | ᱯᱤᱞᱪᱩ ᱵᱩᱰᱷᱤᱭᱮ ᱛᱟᱦᱮᱸ ᱠᱟᱱᱟ ᱠᱩᱲᱤᱠᱚ ᱥᱟᱶ ᱟᱨ ᱯᱤᱞᱪᱩ ᱦᱟᱲᱟᱢ ᱠᱚᱲᱟᱠᱚ ᱥᱟᱶ ᱥᱟᱦᱟᱨᱮ | ᱢᱤᱫ ᱫᱤᱱ ᱥᱩᱬᱩᱠᱩᱡ ᱵᱤᱨ ᱟᱲᱟᱜ ᱥᱟᱠᱟᱢ ᱥᱤᱫ ᱢᱚᱠᱚᱧ ᱠᱟᱛᱮ ᱮᱭᱟᱭ ᱠᱩᱲᱤ ᱪᱟᱯᱟᱠᱤᱭᱟᱹ ᱵᱟᱲᱮ ᱵᱩᱴᱟᱹᱨᱮ ᱮᱱᱮᱡ ᱥᱮᱨᱮᱧ ᱨᱮᱠᱚ ᱜᱷᱩᱲ ᱞᱮᱱ ᱚᱠᱛᱚ, ᱠᱷᱟᱱᱰᱮᱨᱟᱭ ᱵᱤᱨ ᱨᱮ ᱥᱮᱱᱫᱽᱨᱟᱭ ᱠᱟᱱ ᱮᱭᱟᱭ ᱠᱚᱲᱟᱦᱟᱜ ᱥᱟᱨ ᱛᱮᱨᱟᱝ ᱥᱮᱴᱮᱨ ᱟᱠᱟᱱᱟ ᱟᱠᱚᱴᱷᱮᱱ | ᱚᱱᱟ ᱥᱟᱨ ᱫᱚ ᱜᱚᱵᱪᱟᱣ ᱞᱟᱴᱷᱟ ᱞᱮᱱᱟ ᱥᱟᱨᱡᱚᱢ ᱫᱟᱨᱮ ᱨᱮ ᱟᱨ ᱟᱹᱣᱦᱟᱹᱠ ᱥᱟᱨ ᱧᱮᱞᱛᱮ ᱟᱠᱚ ᱟᱠᱚᱠᱚ ᱠᱟᱹᱣ ᱵᱟᱹᱣ ᱞᱮᱱᱟ ‘ᱥᱟᱨᱼᱱᱟ’, ‘ᱥᱟᱨᱼᱱᱟ’ ᱢᱮᱱ ᱠᱟᱛᱮ |
ᱚᱱᱟ ᱛᱟᱭᱚᱢ ᱥᱟᱨ ᱯᱟᱱᱛᱮ ᱯᱟᱱᱛᱮ ᱛᱮ ᱠᱚᱲᱟᱠᱚ ᱦᱮᱡ ᱥᱮᱴᱮᱨ ᱞᱮᱱᱟ | ᱠᱩᱲᱤ ᱠᱚᱣᱟᱜ ᱮᱱᱮᱡ ᱥᱮᱨᱮᱧ ᱨᱮ ᱠᱚᱲᱟᱠᱚ ᱠᱚᱲᱟᱢ ᱪᱮᱴᱟᱜ, ᱯᱟᱹᱪᱷᱞᱟᱹ ᱪᱮᱴᱟᱜ ᱠᱟᱛᱮ ᱛᱩᱢᱫᱟᱜ ᱠᱚ ᱨᱩᱻᱠᱮᱜᱼᱟ | ᱡᱚᱛᱚᱠᱚ ᱡᱩᱨᱤ ᱡᱩᱯᱩᱨᱤᱭᱮᱱᱟ ᱟᱨ ᱮᱭᱟᱭ ᱡᱚᱲ ᱠᱷᱚᱱ ᱮᱦᱚᱵ ᱮᱱᱟ ᱮᱭᱟᱭ ᱯᱟᱹᱨᱤᱥ | ᱱᱚᱶᱟ ᱧᱟᱯᱟᱢ ᱫᱚ ᱥᱟᱨ ᱠᱷᱟᱹᱛᱤᱨ ᱦᱩᱭ ᱞᱮᱱᱛᱮ ᱟᱨ ᱥᱟᱨ ᱧᱮᱞ ᱠᱟᱛᱮ ᱠᱩᱲᱤᱠᱚ ‘ᱥᱟᱨᱼᱱᱟ’ ᱠᱚ ᱢᱮᱱ ᱞᱮᱫ ᱛᱮ ᱛᱟᱭᱚᱢ ᱵᱤᱫᱟᱹᱞ ᱚᱱᱟ ᱚᱠᱛᱚ ᱢᱟᱹᱱ ᱠᱟᱛᱮᱜᱮ ᱫᱷᱚᱨᱚᱢ ᱦᱩᱭ ᱞᱮᱱᱟ ᱥᱟᱨᱱᱟ | 

ᱨᱟᱜᱷᱩ ᱢᱩᱨᱢᱩ ᱞᱟᱠᱪᱟᱨ ᱥᱮᱨᱮᱧ ᱨᱮ ᱡᱟᱦᱟᱸ ᱚᱞ ᱢᱮᱱᱟᱜ ᱠᱟᱛᱷᱟᱭ ᱢᱮᱱ ᱟᱠᱟᱫᱟ ᱚᱱᱟ ᱫᱚ ‘ᱚᱞ ᱪᱤᱠᱤ’ ᱡᱟᱦᱟᱸ ᱨᱚᱲ ᱢᱮᱱᱟᱜ ᱠᱟᱛᱷᱟᱭ ᱢᱮᱱ ᱟᱠᱟᱫᱟ ᱚᱱᱟᱫᱚ ‘ᱥᱟᱱᱛᱟᱲᱤ’ ᱟᱨ ᱡᱟᱦᱟᱸ ᱫᱷᱚᱨᱚᱢ ᱢᱮᱱᱟᱜ ᱠᱟᱛᱷᱟᱭ ᱢᱮᱱ ᱟᱠᱟᱫᱟ ᱚᱱᱟᱫᱚ ‘ᱥᱟᱨᱱᱟ’ ᱫᱷᱚᱨᱚᱢ ᱠᱟᱱᱟ | ᱚᱱᱟᱛᱮ, ᱟᱞᱚᱵᱚᱱ ᱵᱷᱟᱶᱪᱤᱜᱼᱢᱟ ᱟᱨ ᱟᱞᱚᱵᱚᱱ ᱜᱷᱟᱹᱨᱩ ᱜᱷᱟᱹᱱᱴᱩᱜᱼᱢᱟ ᱦᱚᱲᱟᱜ ᱮᱢᱟᱱ ᱛᱮᱢᱟᱱ ᱠᱟᱛᱷᱟ ᱛᱮᱫᱚ | ᱱᱮᱜᱼᱮ ᱜᱮ ᱪᱤᱠᱤ ᱞᱟᱹᱲᱦᱟᱹᱭ ᱨᱮ ᱡᱤᱛ ᱦᱩᱭ ᱟᱠᱟᱱᱟ ᱥᱟᱱᱛᱟᱲᱟᱜ | ᱱᱤᱛ ᱫᱷᱚᱨᱚᱢ ᱠᱷᱟᱹᱛᱤᱨ ᱞᱟᱹᱲᱦᱟᱹᱭ ᱴᱟᱺᱰᱤ ᱛᱮᱠᱚ ᱦᱩᱠᱨᱟᱹᱣ ᱟᱵᱚ ᱠᱟᱱᱟ | ᱦᱤᱸᱫᱩ ᱢᱮᱱᱚᱜᱚᱜ ᱫᱚ ᱰᱮᱸᱜᱟ ᱥᱟᱢᱴᱟᱣ ᱠᱟᱛᱷᱟ ᱠᱟᱱᱟ ᱵᱚᱭᱦᱟ, ᱱᱚᱶᱟ ᱟᱵᱚᱭ ᱵᱮᱜᱽ ᱚᱪᱚᱭᱮᱫ ᱵᱚᱱᱟ ᱮᱴᱟᱜ ᱥᱮᱫ ᱰᱤᱜᱽᱞᱟᱹᱣᱜ ᱞᱟᱹᱜᱤᱫ | ᱥᱟᱱᱛᱟᱲᱟᱜ ᱡᱟᱦᱟᱸ ᱢᱮᱱᱟᱜᱼᱟ, ᱚᱱᱟᱦᱚᱸ ᱧᱩᱛᱩᱢᱟᱱᱟᱜ ᱜᱮ | ᱚᱱᱟᱛᱮ ᱵᱟᱝ ᱫᱟᱹᱲ ᱠᱟᱛᱮ ᱱᱚᱶᱟ ᱨᱮᱜᱮ ᱨᱤᱦᱤᱴ ᱛᱟᱦᱮᱸᱱ ᱢᱟ |

LEPEJ TIRIL ᱞᱮᱯᱮᱡ ᱛᱤᱨᱤᱞ

                                    (A Santali Essay Book)      (ᱥᱟᱱᱛᱟᱲᱤ ᱚᱱᱚᱞ ᱯᱩᱛᱷᱤ)
                            1st Edition-November 2004      ᱮᱛᱚᱦᱚᱵ ᱨᱟᱫᱟ ᱑᱑/᱒᱐᱐᱔
                            2nd Edition-July 2019                ᱫᱚᱥᱟᱨ ᱨᱟᱫᱟ ᱐᱗/᱒᱐᱑᱙
                                                         Written by-      ᱚᱱᱚᱞᱤᱭᱟᱹ
                                       Gangadhar Hansda         ᱜᱚᱝᱜᱟᱫᱷᱚᱨ ᱦᱟᱸᱥᱫᱟᱜ
                                        Village-Janardanpur      ᱟᱹᱛᱩᱼᱫᱚᱱᱟᱯᱩᱨ
                                            P.O-Dhrupada,             ᱰᱟᱠᱼᱫᱷᱨᱩᱯᱚᱫᱟ
                                                 Via-Raisuan             ᱥᱮᱫᱛᱮᱼᱨᱟᱭᱤᱥᱩᱶᱟ
                                 Dist-Keonjhar-758013            ᱡᱤᱞᱟᱼᱠᱤᱸᱡᱷᱤᱨᱼ᱗᱕᱘᱐᱑᱓
                                                   Published by-        ᱯᱟᱨᱥᱟᱞᱮᱛ                                                                                                                                     Hans Hansli Publication        ᱦᱟᱸᱥᱦᱟᱺᱥᱞᱤ ᱯᱚᱵᱽᱞᱤᱠᱮᱥᱚᱱ
                                   Station Bazar,Baripada        ᱥᱴᱮᱥᱚᱱ ᱵᱟᱡᱟᱨ,ᱵᱟᱨᱤᱯᱚᱫᱟ

RAHA RAHLA

By ᱨᱟᱦᱟ ᱨᱟᱦᱞᱟ

ᱟᱹᱭᱩᱨᱤᱭᱟᱹ

Leave a Reply

Your email address will not be published. Required fields are marked *