ᱢᱟᱹᱱᱢᱤ ᱦᱚᱯᱚᱱᱠᱚ ᱢᱤᱫ ᱫᱷᱟᱲ ᱥᱩᱛᱩᱨᱛᱮ ᱛᱚᱞ ᱫᱚᱦᱚᱜᱮ ᱫᱷᱚᱨᱚᱢ ᱫᱚ᱾ᱡᱟᱦᱟᱸ ᱫᱩᱠ ᱢᱩᱦᱤᱸᱢ ᱠᱷᱚᱱᱮ ᱫᱩᱜ ᱫᱚᱜ ᱻ ᱦᱚᱣᱟ ᱚᱱᱟ ᱜᱮ ᱫᱷᱚᱨᱚᱢ | ᱢᱮᱱᱫᱚ ᱜᱟᱹᱦᱤᱨ ᱯᱟᱹᱛᱭᱟᱹᱣᱜᱮ ᱫᱷᱚᱨᱚᱢ ᱫᱚ | ᱱᱚᱶᱟ ᱞᱮᱠᱟᱛᱮ ‘ᱫᱷᱚᱨᱚᱢ’ ᱫᱚ ᱢᱤᱫ ᱵᱚᱝᱜᱟ ᱦᱚᱸᱭ ᱠᱟᱱᱟ | ᱚᱱᱟᱛᱮ ᱫᱷᱚᱮᱚᱢᱫᱚ ᱮᱠᱞᱟᱦᱟᱜ ᱫᱚ ᱵᱟᱝ ᱠᱟᱱᱟ᱾ᱱᱚᱶᱟᱫᱚ ᱢᱤᱫ ᱡᱟᱹᱛᱤ ᱨᱮᱭᱟᱝ, ᱢᱤᱫᱴᱟᱝ ᱥᱟᱶᱛᱟ ᱨᱮᱭᱟᱝ ᱟᱨᱵᱟᱝ ᱢᱤᱫᱴᱟᱝ ᱜᱩᱴ ᱨᱮᱭᱟᱜ ᱯᱟᱹᱛᱭᱟᱹᱣ ᱠᱟᱱᱟ᱾ᱧᱮᱞ ᱧᱟᱢᱚᱜ ᱡᱤᱱᱤᱥ ᱫᱚ ᱵᱟᱝ ᱠᱟᱱᱟ | ᱟᱹᱭᱠᱟᱹᱣ ᱵᱩᱡᱷ ᱛᱮᱭᱟᱜ ᱠᱟᱱᱟ | ᱥᱟᱶᱛᱟᱨᱤ ᱠᱟᱹᱢᱤ ᱛᱟᱞᱟᱛᱮ ᱱᱚᱶᱟᱫᱚ ᱧᱮᱞ ᱧᱟᱢᱚᱜ ᱟ |ᱢᱟᱹᱱᱢᱤ ᱡᱟᱱᱟᱢᱚᱜ ᱠᱷᱚᱱ ᱜᱩᱡᱩᱜ ᱫᱷᱟᱹᱵᱤᱡ ᱡᱟᱦᱟᱸᱜᱮ ᱥᱟᱶᱛᱟ ᱨᱮᱭᱟᱜ ᱠᱟᱹᱢᱤ ᱦᱚᱨᱟ ᱢᱮᱱᱫᱚ ᱪᱷᱟᱹᱴᱭᱟᱹᱨ, ᱥᱮᱛᱟ ᱵᱟᱯᱞᱟ, ᱵᱟᱯᱞᱟ, ᱯᱟᱨᱟᱵᱽ ᱯᱩᱱᱟᱹᱭ, ᱵᱚᱝᱜᱟ ᱵᱩᱨᱩ, ᱜᱚᱡᱜᱩᱨ, ᱵᱷᱟᱱᱰᱟᱱ ᱠᱩᱱᱰᱟᱹᱱ ᱮᱢᱟᱱ ᱥᱩᱥᱟᱹᱨ ᱟᱨ ᱨᱟᱹᱥᱠᱟᱹ ᱠᱟᱹᱢᱤᱠᱚᱨᱮ ᱫᱷᱚᱨᱚᱢᱫᱚ ᱧᱮᱞ ᱧᱟᱢᱚᱜ ᱟ | ᱟᱨᱦᱚᱸ ᱵᱤᱥᱛᱤᱠᱟᱛᱮ ᱫᱩᱠ ᱚᱠᱛᱚᱨᱮ ᱫᱷᱚᱨᱚᱢ ᱪᱮᱛᱟᱱᱨᱮ ᱦᱚᱲᱟᱜ ᱯᱟᱹᱛᱭᱟᱹᱣ ᱰᱷᱮᱨᱚᱜ ᱟ | ᱫᱷᱚᱨᱚᱢ ᱰᱟᱦᱟᱨᱜᱮ ᱥᱟᱹᱨᱤ ᱰᱟᱦᱟᱨ ᱢᱮᱱᱛᱮ ᱢᱮᱱᱠᱟᱛᱮ ᱵᱷᱟᱹᱜᱤ ᱦᱚᱨᱛᱮ ᱞᱟᱦᱟᱜ ᱟᱭ᱾ᱚᱱᱟᱛᱮ ᱥᱟᱨᱱᱟ ᱫᱷᱚᱨᱚᱢᱫᱚ ᱥᱟᱹᱨᱤ ᱫᱷᱚᱨᱚᱢ ᱠᱟᱱᱟ |

            ᱮᱛᱚᱦᱚᱵ ᱢᱟᱹᱱᱢᱤ ᱡᱩᱨᱤ ᱯᱤᱞᱪᱩ ᱦᱟᱲᱟᱢ ᱯᱤᱞᱪᱩ ᱵᱩᱰᱷᱤ ᱛᱤᱠᱤᱱ ᱥᱟᱨ ᱵᱤᱫ ᱞᱮᱱ ᱫᱟᱨᱮ ᱵᱩᱴᱟᱹᱨᱮ ᱫᱩᱜ ᱫᱚᱦᱚᱜ ᱡᱤᱭᱚᱱᱠᱤᱱ ᱮᱦᱚᱵ ᱞᱮᱜ ᱟ ᱚᱱᱟᱜᱮ ᱮᱛᱚᱦᱚᱵ ᱡᱟᱦᱮᱨ ᱟᱲᱫᱚ ᱛᱟᱦᱮᱸ ᱠᱟᱱᱟ᱾ᱚᱸᱰᱮᱜᱮ ᱮᱭᱟᱭ ᱠᱚᱲᱟ ᱮᱭᱟᱭ ᱠᱩᱲᱤ ᱪᱮ ᱦᱚᱯᱚᱱ ᱦᱚᱯᱚᱱ ᱮᱨᱟ ᱟᱱᱛᱮᱠᱤᱱ ᱛᱟᱦᱮᱸ ᱠᱟᱱᱟ |ᱡᱚᱛᱚᱠᱚ ᱥᱟᱨᱱᱟ ᱵᱤᱨᱵᱩᱨᱩᱨᱮ ᱥᱮᱸᱫᱽᱨᱟ ᱠᱟᱨᱠᱟ ᱠᱟᱛᱮᱠᱚ ᱡᱚᱢ ᱟᱹᱥᱩᱞᱚᱜ ᱠᱟᱱ ᱛᱟᱦᱮᱸᱱ | ᱢᱤᱫ ᱫᱤᱱᱫᱚ ᱠᱩᱲᱤᱠᱚ ᱥᱩᱬᱩᱠᱩᱡ ᱵᱤᱨᱛᱮ ᱟᱲᱟᱜ ᱥᱟᱠᱟᱢ ᱦᱮᱡᱠᱚ ᱥᱮᱱᱞᱮᱱᱟ ᱟᱨ ᱠᱚᱲᱟᱠᱚᱫᱚ ᱠᱷᱟᱱᱰᱮᱨᱟᱭ ᱵᱤᱨᱛᱮ ᱥᱮᱸᱫᱨᱟᱠᱚ ᱥᱮᱱᱟ | ᱡᱤᱞ ᱛᱩᱧᱮ ᱥᱟᱨᱫᱚ ᱠᱷᱟᱱᱰᱮᱨᱟᱭ ᱵᱤᱨ ᱯᱟᱨᱚᱢᱠᱟᱛᱮ ᱥᱩᱬᱩᱠᱩᱡ ᱵᱤᱨ ᱨᱮᱭᱟᱜ ᱢᱤᱫ ᱫᱟᱨᱮᱨᱮ ᱞᱟᱴᱷᱟᱭᱮᱱᱟ | ᱠᱩᱲᱤᱠᱚ ᱧᱮᱞ ᱠᱟᱛᱮᱠᱚ ᱟᱪᱠᱟᱭᱮᱱᱟ ᱟᱨ `ᱥᱟᱨᱻᱱᱟ’ ᱢᱮᱱᱛᱮ ᱟᱹᱲᱟᱹᱠᱚ ᱯᱷᱚᱴᱮᱞ ᱜᱚᱫ ᱠᱮᱜ ᱟ | ᱤᱱᱟᱹ ᱦᱤᱞᱚᱜ ᱠᱷᱚᱱ ᱚᱱᱟ ᱫᱟᱨᱮᱫᱚ ᱥᱟᱨ ᱮ ᱡᱚᱢ ᱞᱮᱫ ᱛᱮ ᱥᱟᱨᱡᱚᱢ ᱫᱟᱨᱮ ᱦᱩᱭᱮᱱᱟ | ᱯᱤᱞᱪᱩ ᱦᱟᱲᱟᱢ ᱮᱛᱚᱦᱚᱵ ᱛᱩᱧᱞᱮᱫ ᱥᱟᱨᱦᱚᱸ ᱥᱟᱨᱡᱚᱢ ᱵᱩᱴᱟᱹᱨᱮᱜᱮ ᱵᱤᱫ ᱞᱮᱱᱟ |

         ᱥᱟᱨᱱᱟ ᱵᱤᱨ ᱥᱟᱨᱡᱚᱢ ᱵᱩᱴᱟᱹᱨᱮ ᱥᱟᱶᱛᱟᱠᱚ ᱮᱦᱚᱵ ᱞᱮᱜ ᱟ ᱟᱨ ᱚᱱᱰᱮᱜᱮ ᱫᱩᱜ ᱫᱚᱦᱚ ᱴᱷᱟᱶᱦᱚᱸᱠᱚ ᱧᱟᱢᱞᱮᱜ ᱟ | ᱱᱟᱛᱮ ᱥᱟᱨᱡᱚᱢ ᱜᱟᱡᱟᱲᱜᱮ ᱛᱟᱭᱚᱢᱫᱚ ᱡᱟᱦᱮᱨ ᱜᱟᱲ ᱮᱱᱟ ᱟᱨ ᱫᱩᱜ ᱫᱚᱦᱚᱜ ᱯᱟᱹᱛᱭᱟᱹᱣ ᱫᱚ ᱫᱷᱚᱨᱚᱢ ᱮᱱᱟ ᱟᱨ ᱥᱟᱨᱱᱟ ᱫᱷᱚᱨᱚᱢ ᱢᱮᱱᱛᱮ ᱧᱩᱛᱩᱢ ᱮᱱᱟ | ᱱᱚᱣᱟᱫᱚ ᱥᱟᱱᱛᱟᱲ ᱠᱚᱣᱟᱜ ᱥᱚᱱᱚᱛ ᱫᱷᱚᱮᱚᱢ ᱠᱟᱱᱟ | ᱥᱟᱱᱛᱟᱲ ᱜᱤᱫᱽᱨᱟᱹᱭ ᱡᱟᱱᱟᱢ ᱞᱮᱱᱠᱷᱟᱱ ᱥᱮᱫᱟᱭᱫᱚ ᱩᱜᱽᱞᱤ ᱛᱮᱜᱮ ᱱᱟᱹᱨᱠᱚ ᱜᱮᱫᱮᱫ ᱠᱚ ᱛᱟᱦᱮᱸᱱ ᱟᱨ ᱥᱟᱨᱜᱮ ᱥᱟᱱᱛᱟᱲ ᱡᱟᱹᱛᱤᱭᱟᱜ ᱫᱷᱚᱮᱚᱢ ᱪᱤᱱᱦᱟᱹ ᱞᱮᱠᱟᱛᱮ ᱟᱡᱟᱜ ᱵᱚᱦᱚᱜ ᱥᱮᱫᱨᱮᱠᱚ ᱵᱤᱫ ᱠᱟᱜ ᱟ | ᱟᱜ ᱥᱟᱨᱜᱮ ᱥᱟᱱᱛᱟᱲᱟᱜ ᱥᱟᱯᱟᱵ ᱫᱚ ᱡᱟᱦᱟᱸ ᱫᱷᱚᱨᱚᱢ ᱥᱟᱯᱟᱵ ᱢᱮᱱᱛᱮ ᱧᱩᱛᱩᱢ ᱟᱠᱟᱱᱟ | ᱥᱟᱨᱱᱟ ᱫᱷᱚᱨᱚᱢ ᱨᱮᱭᱟᱜ ᱢᱩᱬᱩᱛᱫᱚ ᱥᱟᱨᱡᱚᱢ ᱵᱩᱴᱟᱹᱨᱮ, ᱥᱟᱨᱡᱚᱢ ᱜᱟᱲᱨᱮ, ᱡᱟᱦᱮᱨ ᱜᱟᱲᱨᱮ | ᱚᱱᱟᱜᱮ ᱥᱟᱨᱱᱟ ᱫᱷᱚᱨᱚᱢ ᱨᱮᱭᱟᱜ ᱩᱨᱩᱢᱫᱚ ᱱᱚᱶᱟ ᱫᱷᱚᱮᱚᱢ ᱨᱮᱭᱟᱜ ᱧᱩᱛᱩᱢᱫᱚ ᱫᱤᱠᱩ ᱠᱚᱣᱟᱜ ᱚᱠᱟ ᱯᱩᱛᱷᱤ ᱯᱚᱛᱚᱵᱨᱮ ᱵᱟᱹᱱᱩᱜ ᱨᱮᱦᱚᱸ ᱟᱹᱫᱤᱢᱠᱚ ᱥᱮᱫᱟᱭ ᱠᱷᱚᱱᱠᱚ ᱢᱟᱱᱟᱣ ᱟᱹᱜᱩ ᱟᱠᱟᱜ ᱟ | ᱵᱤᱥᱛᱤ ᱠᱟᱭᱛᱮ ᱥᱟᱱᱛᱟᱲᱠᱚ ᱥᱟᱨᱱᱟ ᱫᱷᱚᱨᱚᱢ ᱫᱚᱠᱚ ᱵᱟᱛᱟᱣ ᱮᱫᱟ | ᱱᱤᱛᱚᱜᱟᱜ ᱯᱩᱛᱷᱤ ᱠᱚᱨᱮᱫᱚ ᱥᱟᱱᱛᱟᱲ ᱦᱚᱲᱠᱚ ᱱᱚᱶᱟ ᱤᱫᱤ ᱠᱟᱛᱮ ᱟᱹᱰᱤ ᱛᱮᱫ ᱜᱮᱠᱚ ᱪᱟᱨᱪᱟ ᱮᱫᱟ | ᱦᱚᱲ ᱞᱮᱠᱷᱟ ᱡᱷᱚᱜ ᱦᱚᱸ ᱟᱹᱰᱤᱜᱟᱱ ᱥᱟᱱᱛᱟᱲ ᱦᱚᱲ ᱟᱠᱚᱣᱟᱜ ᱫᱷᱚᱨᱚᱢ ᱫᱚ ᱥᱟᱨᱱᱟ ᱢᱮᱱᱛᱮ ᱜᱮᱠᱚ ᱚᱞᱮᱫᱟ | ᱡᱮᱜᱮᱛᱨᱮ ᱟᱹᱰᱤ ᱞᱮᱠᱟᱱ ᱫᱷᱚᱨᱚᱢ ᱢᱮᱱᱟᱜ ᱟ | ᱚᱱᱟ ᱵᱷᱤᱛᱨᱤ ᱠᱷᱚᱱ ᱥᱟᱨᱱᱟ ᱫᱷᱚᱨᱚᱢ ᱦᱚᱸ ᱢᱤᱜᱴᱟᱝ ᱫᱷᱚᱨᱚᱢ
ᱠᱟᱱᱟ | ᱡᱚᱛᱚ ᱫᱷᱚᱮᱚᱢ ᱨᱮᱭᱟᱜ ᱡᱚᱥᱫᱚ ᱢᱤᱫᱜᱮᱭᱟ, ᱛᱚᱵᱮ ᱱᱮᱢᱟᱪᱟᱨ ᱫᱚ ᱛᱟᱭ ᱵᱷᱮᱜᱟᱨ ᱵᱷᱮᱜᱟᱨ ᱜᱮᱭᱟ | ᱱᱮᱢᱟᱪᱟᱨ ᱠᱟᱛᱷᱟ ᱧᱮᱞ ᱞᱮᱠᱷᱟᱱᱜᱮ ᱥᱟᱨᱱᱟ ᱫᱷᱚᱨᱚᱢ ᱨᱮᱭᱟᱜ ᱨᱩᱯ ᱢᱚᱦᱚᱨ ᱪᱮᱫ ᱞᱮᱠᱟᱱᱟ ᱚᱱᱟ ᱵᱟᱰᱟᱭ ᱧᱟᱢᱚᱜ ᱟ |

            ᱥᱟᱨᱱᱟ ᱫᱷᱚᱨᱚᱢ ᱫᱚ ᱟᱹᱫᱤᱵᱟᱹᱥᱤ ᱦᱚᱲ ᱠᱚᱣᱟᱜ ᱫᱷᱚᱨᱢ ᱠᱟᱱᱟ | ᱱᱚᱶᱟ ᱫᱷᱚᱨᱚᱢ ᱨᱮᱭᱟᱜ ᱱᱮᱢᱟᱪᱟᱨᱫᱚ ᱦᱤᱸᱫᱩ ᱫᱷᱚᱨᱚᱢ ᱠᱷᱚᱱᱫᱚ ᱵᱷᱮᱜᱟᱨ ᱜᱮᱭᱟ | ᱥᱟᱨᱱᱟ ᱫᱷᱚᱨᱚᱢ ᱨᱮᱫᱚ ᱡᱚᱛᱚᱣᱟᱜ ᱠᱟᱹᱢᱤᱨᱮ ᱫᱷᱚᱨᱢᱚ ᱵᱟᱵᱟᱜᱮ ᱥᱟᱠᱷᱤ ᱛᱟᱦᱮᱸᱱᱟᱭ | ᱫᱷᱚᱨᱚᱢ ᱧᱩᱛᱩᱢ ᱛᱮᱜᱮ ᱵᱚᱝᱜᱟ ᱦᱚᱸ ᱦᱩᱭᱩᱜ ᱟ | ᱫᱷᱚᱨᱢᱚᱜᱮ ᱥᱟᱨᱱᱟ ᱫᱷᱚᱨᱚᱢ ᱨᱮᱫᱚ ᱡᱚᱛᱚᱭᱤᱡ ᱠᱟᱱᱟᱭ | ᱤᱠᱷᱟᱹᱱ ᱡᱟᱦᱮᱨ ᱨᱮᱫᱚ ᱢᱟᱨᱟᱝ ᱵᱩᱨᱩ, ᱡᱟᱦᱮᱨ ᱟᱭᱚ, ᱢᱚᱬᱮᱠᱚ ᱛᱩᱨᱩᱭᱠᱚ, ᱥᱤᱢᱟᱹ ᱨᱮᱫᱚ ᱥᱤᱢᱟᱹᱥᱟᱲᱮ, ᱚᱲᱟ ᱜᱨᱮᱫᱚ ᱚᱲᱟ ᱜ ᱵᱚᱝᱜᱟ , ᱦᱟᱯᱲᱟᱢ ᱵᱚᱝᱜᱟ , ᱜᱚᱲᱟᱵᱚᱝᱜᱟ, ᱴᱟᱺᱰᱤᱨᱮᱫᱚ ᱴᱟᱺᱰᱤ ᱟᱨᱵᱟᱝᱢᱟ ᱟᱵᱽᱜᱮ ᱵᱚᱝᱜᱟ, ᱜᱚᱴᱵᱚᱝᱜᱟ, ᱢᱟᱜᱽ ᱵᱚᱝᱜᱟ ᱟᱨᱦᱚᱸ ᱚᱡᱷᱟᱵᱚᱝᱜᱟ ᱮᱢᱟᱱᱠᱚ ᱵᱚᱝᱜᱟ ᱟᱠᱚᱣᱟ | ᱱᱩᱠᱩᱫᱚ ᱢᱟᱭᱟᱝᱡᱚᱢ ᱵᱚᱝᱜᱟ ᱠᱟᱱᱟᱠᱚ, ᱦᱟᱺᱰᱤ ᱧᱩ ᱵᱚᱝᱜᱟ ᱠᱟᱱᱟᱠᱚ |

      ᱥᱟᱨᱱᱟ ᱫᱷᱚᱨᱚᱢ ᱦᱚᱲᱟᱜ ᱯᱟᱹᱨᱤᱥᱦᱚᱸ ᱦᱤᱱᱫᱩ ᱫᱷᱚᱨᱢᱚ ᱨᱮᱭᱟᱜ ᱜᱳᱛᱨᱚ ᱠᱷᱚᱱᱫᱚ ᱵᱷᱮᱜᱟᱨ ᱜᱮᱭᱟ | ᱡᱮᱢᱚᱱ ᱦᱤᱱᱫᱩ ᱦᱚᱲᱟᱜ ᱜᱳᱛᱨᱚ ᱪᱤ ᱠᱷᱩᱴᱫᱚ ᱠᱟᱥᱭᱚᱯᱚ, ᱜᱳᱣᱛᱚᱢᱚ, ᱵᱷᱚᱨᱚᱫᱣᱟᱡᱽ ᱮᱢᱟᱱ ᱡᱟᱦᱟᱸᱫᱚ ᱢᱩᱱᱤ ᱨᱩᱥᱤ ᱠᱚᱣᱟᱜ ᱧᱩᱛᱩᱢᱛᱮ | ᱤᱠᱷᱟᱹᱱ ᱥᱟᱨᱱᱟ ᱫᱷᱚᱨᱚᱢ ᱦᱚᱲᱟᱜ ᱠᱷᱩᱴ ᱪᱤ ᱠᱷᱚᱸᱰᱫᱚ ᱱᱤᱡᱽ, ᱥᱤᱠᱲᱤ, ᱪᱤᱞᱵᱤᱸᱫᱦᱟ, ᱠᱟᱬᱟ, ᱚᱵᱚᱨ, ᱠᱷᱟᱱᱰᱟ ᱡᱟᱜᱟᱣ, ᱢᱤᱨᱩ ᱵᱟᱦᱟ, ᱡᱤᱦᱩ, ᱞᱟᱫ, ᱦᱟᱺᱰᱤ, ᱥᱚᱲᱮ, ᱠᱟᱰᱟ, ᱦᱟᱣ, ᱰᱚᱸᱰᱠᱟ, ᱥᱮᱛᱟ ᱛᱤᱭᱟᱹᱜ, ᱥᱟᱦᱨ, ᱜᱟᱲ, ᱠᱟᱭᱛᱟ, ᱦᱮᱸᱥᱮᱞ, ᱠᱟᱰᱣᱟᱨ, ᱠᱤᱠᱤᱨ, ᱥᱟᱢᱟᱜ, ᱡᱚᱵᱮ, ᱛᱤᱨᱤᱞ,ᱵᱩᱨᱩ ᱵᱮᱨᱮᱫ, ᱵᱟᱫᱚᱞᱤ, ᱫᱟᱱᱛᱮᱞᱟ, ᱵᱟᱲᱮ ᱞᱤᱣᱤᱫ, ᱥᱮᱛᱟ ᱛᱤᱭᱟᱹᱜ, ᱵᱩᱨᱩ ᱵᱮᱨᱮᱫ, ᱠᱟᱨᱦᱟᱲ, ᱞᱟᱲ, ᱯᱚᱴᱚᱢ, ᱥᱚᱞᱮ, ᱥᱟᱸᱠ, ᱥᱤᱯᱟᱹᱦᱤ, ᱢᱮᱨᱟᱞ, ᱞᱩᱠᱩᱭ, ᱵᱟᱹᱨᱪᱷᱤ, ᱪᱟᱨᱮᱡ, ᱴᱟᱝᱜᱟ, ᱵᱷᱤᱸᱫᱟᱹᱲ, ᱥᱤᱸᱫᱩᱨ, ᱪᱚᱸᱫᱚᱲᱟ, ᱠᱟᱹᱱᱷᱩ, ᱱᱟᱭᱠᱮ ᱠᱷᱤᱞ, ᱨᱚᱜ ᱞᱩᱛᱩᱨ, ᱵᱤᱴᱚᱞ, ᱟᱺᱜᱟᱹᱨᱤᱭᱟᱹ, ᱴᱩᱲᱠᱩ ᱞᱩᱢᱟᱹᱝ, ᱛᱟᱨᱚᱵ, ᱥᱚᱲᱮ, ᱪᱟᱹᱶᱨᱤᱭᱟᱹ, ᱜᱩᱟᱹ, ᱠᱩᱦᱤ, ᱛᱤᱞᱚᱠ, ᱵᱟᱭᱟᱨ, ᱛᱤᱠᱤᱱ, ᱢᱟᱸᱡᱟᱱ, ᱢᱩᱛᱷᱟᱹ, ᱵᱷᱤᱰᱤ, ᱥᱟᱸᱜᱮ, ᱥᱤᱫᱩᱵ ᱮᱢᱟᱱ ᱟᱹᱰᱤ ᱞᱮᱠᱟᱱᱟᱜ | ᱥᱟᱨᱱᱟ ᱫᱷᱚᱨᱢ ᱦᱚᱲ ᱠᱚᱫᱚ ᱠᱷᱚᱫᱟᱜ ᱟᱠᱚ ᱟᱨ ᱥᱤᱠᱷᱟᱹᱜ ᱟᱠᱚ | ᱱᱚᱶᱟ ᱦᱚ ᱸ ᱫᱷᱚᱨᱚᱢ ᱪᱤᱱᱦᱟᱹᱜᱮ | ᱜᱤᱫᱽᱨᱟᱹᱭ ᱡᱟᱱᱟᱢ ᱞᱮᱱᱠᱷᱟᱱ ᱟᱨ ᱦᱚᱲᱮ ᱜᱚᱡ ᱞᱮᱱᱠᱷᱟᱱ ᱩᱱᱠᱩ ᱚᱲᱟᱜ ᱦᱚᱲ ᱥᱩᱢᱩᱝᱫᱚ ᱵᱟᱠᱚ ᱪᱷᱩᱛᱩᱜ ᱟ, ᱟᱹᱛᱩ ᱜᱚᱨᱟᱢ ᱦᱚᱸ ᱪᱷᱩᱛᱩᱜ ᱟ | ᱤᱠᱷᱟᱹᱱ ᱦᱤᱸᱫᱩ ᱠᱚᱣᱟᱜ ᱫᱚ ᱚᱱᱟ ᱵᱟᱹᱱᱩᱜ ᱟ | ᱥᱟᱨᱱᱟ ᱫᱷᱚᱨᱚᱢ ᱦᱚᱲᱟᱜᱫᱚ ᱦᱤᱸᱫᱩ ᱫᱷᱚᱨᱢᱚᱨᱤᱱ ᱦᱚᱲ ᱠᱚᱣᱟᱜ ᱨᱚᱲ ᱠᱷᱚᱱ ᱨᱚᱲᱦᱚᱸ ᱵᱷᱮᱜᱟᱨ ᱜᱮᱭᱟ | ᱟᱠᱚᱣᱟᱜ ᱨᱚᱲᱫᱚ ᱟᱨᱡᱭᱚ ᱯᱚᱨᱤᱵᱟᱨ (ᱜᱷᱟᱨᱚᱸᱡᱽ) ᱨᱮᱭᱟᱜ ᱠᱷᱟᱱ ᱟᱵᱚᱣᱟᱜ ᱫᱚ ᱚᱥᱴᱨᱤᱠ ᱜᱷᱟᱨᱚᱸᱡᱽ ᱨᱮᱭᱟᱜ | ᱪᱷᱟᱹᱴᱭᱟᱹᱨ ᱵᱟᱯᱞᱟ ᱟᱨ ᱵᱷᱟᱱᱰᱟᱱ ᱛᱮᱞ ᱱᱟᱦᱟᱱ ᱨᱮᱭᱟᱜ ᱠᱟᱹᱢᱤᱦᱚᱨᱟᱦᱚᱸ ᱟᱹᱛᱩ ᱢᱚᱬᱮ ᱦᱚᱲᱟᱱᱛᱮ ᱩᱛᱟᱹᱨ ᱦᱩᱭ ᱫᱟᱲᱮᱭᱟᱜ ᱟ |

               ᱥᱟᱨᱱᱟ ᱫᱷᱚᱨᱢ ᱨᱮᱭᱟᱜ ᱟᱨᱢᱤᱫ ᱢᱟᱨᱟᱝ ᱨᱩᱯᱛᱟᱭ ᱦᱩᱭᱩᱜ ᱠᱟᱱᱟ ᱟᱡᱟᱜ ᱥᱟᱶᱛᱟᱨᱤ ᱢᱩᱬ ᱠᱟᱹᱢᱤ ᱦᱩᱭᱮᱱ ᱪᱮ ᱯᱟᱨᱟᱵᱽ ᱯᱩᱱᱟᱹᱭ ᱠᱟᱹᱢᱤ ᱮᱴᱟᱜ ᱡᱟᱹᱛᱠᱚᱫᱚ ᱵᱟᱭ ᱥᱮᱞᱮᱫ ᱠᱚᱣᱟ | ᱵᱟᱵᱽᱬᱮᱭᱟᱜ ᱵᱟᱠᱷᱮᱬ,ᱫᱷᱚᱵᱟᱣᱟᱜ ᱞᱩᱜᱽᱲᱤ ᱥᱚᱵᱚᱫ ᱪᱮ ᱵᱷᱟᱹᱱᱰᱟᱹᱨᱤᱭᱟᱜ ᱦᱚᱭᱚ ᱢᱩᱸᱰᱨᱟᱹ, ᱨᱟᱢᱟᱜᱮᱫ ᱠᱚᱫᱚ ᱵᱟᱭ ᱞᱟᱹᱠᱛᱤᱭᱟ | ᱚᱱᱟᱛᱮ ᱥᱟᱨᱱᱟ ᱫᱷᱚᱨᱚᱢᱫᱚ ᱥᱩᱥᱟᱹᱨ ᱥᱟᱢᱴᱟᱣ ᱫᱷᱚᱨᱚᱢ ᱠᱟᱱᱟ, ᱡᱟᱦᱟᱸ ᱚᱱᱟ ᱫᱷᱚᱨᱚᱢ ᱨᱤᱱ ᱦᱚᱲ ᱡᱩᱢᱤᱫ ᱠᱟᱛᱮ ᱫᱚᱦᱚ ᱠᱚᱣᱟᱭ | ᱡᱩᱢᱤᱫ ᱫᱟᱲᱮ ᱢᱮᱱᱟᱜ ᱠᱷᱟᱹᱛᱤᱨᱜᱮ ᱟᱨ ᱥᱩᱥᱟᱹᱨ ᱦᱚᱨᱛᱮ ᱛᱟᱲᱟᱢ ᱟᱠᱟᱫ ᱠᱷᱟᱹᱛᱤᱨ ᱱᱤᱛᱦᱚᱸ ᱚᱱᱟ ᱡᱤᱭᱟᱹᱲ ᱠᱟᱛᱮᱜᱮ ᱢᱮᱱᱟᱜ ᱟ | ᱱᱟᱥᱮᱜᱟᱱ ᱦᱚᱸ ᱞᱟᱢᱡᱟᱜ ᱵᱟᱹᱱᱩᱜ ᱪᱮ ᱜᱚᱥᱚ ᱵᱟᱹᱱᱩᱜ |

            ᱥᱟᱨᱱᱟ ᱫᱷᱚᱨᱚᱢ ᱨᱮᱭᱟᱜ ᱨᱟᱭᱨᱤᱛ ᱫᱚ ᱟᱹᱰᱤ ᱩᱛᱟᱹᱨ ᱩᱨᱤᱡ ᱜᱮᱭᱟ ᱟᱨᱦᱚᱸ ᱚᱠᱟᱨᱮᱫᱚ ᱥᱟᱶᱛᱟ ᱨᱮᱭᱟᱜ ᱵᱷᱟᱹᱞᱟᱹᱭ ᱠᱷᱟᱹᱛᱤᱨ ᱰᱷᱤᱞ ᱦᱚᱸ ᱰᱷᱤᱞ ᱜᱮᱭᱟ᱾ᱚᱠᱟᱨᱮ ᱢᱤᱫᱵᱟᱹᱴᱤ ᱦᱟᱺᱰᱤᱛᱮ ᱠᱟᱹᱢᱤ ᱛᱚᱨᱟᱣᱜ ᱠᱷᱟᱱ ᱟᱨ ᱚᱠᱟᱨᱮᱫᱚ ᱢᱚᱬᱮ ᱴᱩᱠᱩᱡ ᱦᱟᱺᱰᱤ ᱞᱟᱹᱠᱛᱤᱭᱟ | ᱱᱤᱛ ᱦᱟᱺᱰᱤ ᱨᱮᱱᱟᱜ ᱠᱷᱟᱨᱟᱯ ᱵᱮᱵᱷᱟᱨ ᱦᱩᱭᱩᱜ ᱠᱟᱱᱨᱮᱦᱚᱸ ᱦᱟᱺᱰᱤ ᱵᱚᱝᱜᱟ ᱵᱟᱹᱜᱤ ᱞᱮᱠᱷᱟᱱ ᱥᱟᱨᱱᱟ ᱫᱷᱚᱨᱢ ᱨᱮᱱᱟᱜ ᱟᱹᱰᱤᱜᱟᱱ ᱥᱮᱨᱣᱟ ᱪᱮ ᱱᱮᱶ ᱱᱮᱢᱟᱪᱟᱨ ᱦᱚᱸ ᱟᱛᱨᱮ ᱜᱚᱫᱚᱜ ᱟ |

        ᱫᱷᱚᱨᱚᱢ ᱨᱮᱭᱟᱜ ᱫᱚ ᱱᱚᱝᱠᱟ ᱟᱹᱰᱤᱜᱟᱱ ᱨᱩᱯ ᱢᱮᱱᱟᱜ ᱟ | ᱯᱟᱨᱟᱵᱽ ᱯᱩᱱᱟᱹᱭ, ᱵᱚᱝᱜᱟ ᱵᱩᱨᱩ, ᱮᱱᱮᱡ ᱥᱮᱨᱮᱧ ᱛᱟᱞᱟᱛᱮ ᱱᱚᱶᱟᱫᱚ ᱧᱮᱞᱚᱜ ᱟ | ᱟᱵᱚᱣᱟᱜ ᱦᱩᱭᱮᱱ ᱪᱮ ᱮᱴᱟᱜᱤᱡᱟᱜ, ᱫᱷᱚᱨᱚᱢ ᱢᱮᱱᱟᱜ ᱠᱷᱟᱹᱛᱤᱨᱜᱮ ᱫᱷᱟᱹᱨᱛᱤ ᱴᱤᱠᱟᱹᱣ ᱟᱠᱟᱱᱟ | ᱫᱷᱚᱨᱚᱢᱜᱮ ᱵᱚᱝᱜᱟ, ᱩᱱᱤᱜᱮ ᱢᱟᱹᱱᱢᱤ ᱠᱚᱭᱤᱡ ᱟᱭᱚᱵᱟᱵᱟ | ᱫᱷᱚᱨᱚᱢ ᱦᱚᱨᱛᱮ ᱛᱟᱲᱟᱢ ᱞᱮᱠᱷᱟᱱ ᱢᱚᱱᱮ ᱡᱤᱣᱤ ᱟᱨ ᱦᱚᱲᱢᱚᱫᱚ ᱡᱤᱭᱟᱹᱲᱜᱮ ᱛᱟᱦᱮᱸᱱᱟ |

           ᱥᱟᱨᱱᱟ ᱫᱷᱚᱨᱚᱢ ᱯᱩᱛᱷᱤ `ᱦᱤᱛᱟᱹᱞ’ ᱨᱮ ᱫᱷᱚᱨᱢᱚ ᱵᱟᱵᱟᱣᱟᱜ ᱠᱟᱛᱷᱟᱫᱚ ᱵᱷᱟᱹᱜᱤ ᱞᱮᱠᱟ ᱪᱤᱛᱟᱹᱨ ᱟᱠᱟᱱᱟ | ᱫᱷᱚᱨᱚᱢ ᱫᱟᱲᱮᱜᱮ ᱡᱤᱣᱤᱫ ᱫᱟᱲᱮ ᱠᱟᱱᱟ | ᱫᱷᱚᱨᱚᱢᱨᱮ ᱯᱟᱹᱛᱭᱟᱹᱣ ᱢᱮᱱᱟᱜᱛᱮ ᱢᱟᱹᱱᱢᱤ ᱥᱩᱥᱟᱹᱨ ᱥᱩᱞᱩᱠ ᱡᱤᱣᱤ ᱠᱷᱟᱱᱰᱟᱣ ᱮᱫᱟᱭ |ᱚᱱᱟᱛᱮᱜᱮ ᱠᱟᱛᱷᱟᱨᱮ ᱢᱮᱱᱟᱜ –

ᱫᱷᱚᱨᱚᱢ ᱫᱟᱲᱮ ᱡᱤᱣᱤᱫ ᱫᱷᱤᱨᱤ
ᱪᱮᱫ ᱛᱮᱦᱚᱸ ᱵᱟᱭ ᱥᱮᱴᱮᱡ ᱥᱟᱹᱨᱤ,
ᱯᱟᱯ ᱢᱚᱱᱮ ᱯᱚᱫᱽᱜᱟ ᱫᱷᱤᱨᱤ
ᱰᱟᱹᱱ ᱵᱷᱩᱛᱠᱚ ᱢᱟᱹᱴᱩᱡ ᱥᱟᱹᱨᱤ |

  • ᱩᱪᱷᱟᱹᱱ ᱟᱲᱟᱝ UCHHAN ARANG ᱯᱚᱛᱚᱵ ᱠᱷᱚᱱ ᱛᱩᱢᱟᱹᱞ ᱟᱠᱟᱱᱼᱟ |
  • Written by-Dr. Damayanti Beshra
  • Ward No-9, Madhuban
  • Behind Ranisati Mandir
  • Baripada, Dist-Mayurbhanj-757001
  • Publication:
  • Dhigij Publication
  • Ward No-9, Madhuban
  • Baripada, Dist-Mayurbhanj-757001
2080cookie-checkᱥᱟᱨᱱᱟ ᱫᱷᱚᱨᱚᱢ ᱨᱮᱭᱟᱜ ᱨᱩᱯ ᱢᱚᱦᱚᱨ
RAHA RAHLA

By ᱨᱟᱦᱟ ᱨᱟᱦᱞᱟ

ᱟᱹᱭᱩᱨᱤᱭᱟᱹ