ᱦᱚᱭ ! ᱡᱟᱦᱟᱸᱨᱮᱢ ᱡᱚᱦᱟᱨᱟ ᱚᱱᱟᱜᱮ ᱡᱟᱦᱮᱨ ᱫᱚᱵᱚᱱ ᱢᱮᱛᱟᱜ ᱠᱟᱱᱟ | ᱟᱵᱚ ᱟᱹᱫᱤᱢ ᱡᱟᱹᱛᱤ ᱠᱚᱣᱟᱜ ᱡᱟᱦᱮᱨ ᱫᱚ ᱯᱮ ᱞᱮᱠᱟᱱᱟ | ᱚᱱᱟᱫᱚ ……

᱑) ᱥᱤᱧ ᱵᱤᱨ ᱡᱟᱦᱮᱨ
᱒) ᱢᱟᱱ ᱵᱤᱨ ᱡᱟᱦᱮᱨ
᱓) ᱢᱟᱫᱮ ᱵᱤᱨ ᱡᱟᱦᱮᱨ

ᱥᱤᱧ ᱵᱤᱨ ᱡᱟᱦᱮᱨ ᱺᱼ

                ᱥᱤᱧ ᱵᱤᱨ ᱡᱟᱦᱮᱨ ᱫᱚ ᱟᱵᱚᱣᱟᱜ ᱥᱟᱨᱱᱟ ᱫᱷᱚᱨᱚᱢ ᱨᱮᱱᱟᱜ ᱫᱷᱚᱨᱚᱢ ᱛᱷᱟᱱ ᱠᱟᱱᱟ, ᱱᱚᱣᱟᱫᱚ ᱦᱟᱯᱲᱟᱢ ᱠᱚ ᱟᱹᱛᱩ ᱥᱟᱨ ᱥᱟᱹᱜᱩᱱ ᱚᱠᱛᱮ ᱠᱚ ᱛᱮᱸᱜᱮᱱ ᱟᱠᱟᱜᱼᱟ | ᱱᱚᱰᱮ ᱫᱚ ᱥᱤᱧ ᱵᱚᱸᱜᱟ ᱥᱟᱹᱠᱷᱤ ᱠᱟᱛᱮ ᱡᱟᱦᱮᱨ ᱮᱨᱟ, ᱢᱚᱬᱮᱠᱚ, ᱞᱤᱴᱟᱹ, ᱛᱩᱨᱩᱭ ᱠᱚ ᱥᱟᱶᱛᱮ ᱨᱟᱠᱟᱵ ᱵᱚᱸᱜᱟ ᱠᱚᱵᱚᱱ ᱥᱮᱵᱟ ᱵᱮᱵᱷᱟᱨ ᱠᱚᱣᱟ | ᱱᱚᱰᱮ ᱫᱚ ᱟᱹᱛᱩ ᱫᱤᱥᱚᱢ ᱱᱟᱯᱟᱭ ᱛᱟᱦᱮᱱ ᱥᱟᱶ ᱛᱮ ᱟᱹᱛᱩ ᱨᱮ ᱨᱚᱜᱟᱜ ᱵᱤᱜᱤᱱᱟᱜ ᱟᱞᱚ ᱵᱚᱞᱚᱱ ᱢᱟ ᱥᱚᱲᱚᱱ ᱢᱟ ᱡᱤᱣᱤ ᱡᱟᱹᱛᱤ ᱱᱟᱭ ᱵᱟᱲᱮ ᱱᱟᱯᱟᱭ ᱵᱟᱲᱮ ᱢᱮᱱᱛᱮ ᱵᱚᱱ ᱵᱚᱸᱜᱟ ᱵᱳᱨᱳᱭᱟ | ᱱᱚᱣᱟ ᱡᱟᱦᱮᱨ ᱨᱮᱫᱚ ᱡᱟᱦᱮᱨ ᱮᱨᱟ ᱜᱮ ᱢᱩᱲᱩᱛ ᱞᱮᱠᱟ ᱛᱮ ᱵᱚᱱ ᱥᱮᱵᱟᱭᱮ ᱠᱟᱱᱟ | ᱟᱹᱛᱩ ᱨᱮ ᱢᱟᱦᱬᱟ ᱨᱮ ᱫᱩᱠ ᱟᱱᱟᱴ ᱠᱚ ᱦᱩᱭ ᱞᱮᱱ ᱠᱷᱟᱱ ᱱᱟᱭᱠᱮ ᱵᱟᱵᱟ ᱚᱱᱟ ᱥᱤᱧ ᱵᱤᱨ ᱡᱟᱦᱮᱨ ᱨᱮ ᱥᱟᱹᱜᱩᱱ ᱞᱚᱴᱟ ᱫᱟᱜᱼᱮ ᱫᱚᱲᱚᱢ ᱠᱟᱛᱮ ᱚᱛᱟ ᱛᱟᱵᱮᱨ ᱞᱮᱱ ᱠᱷᱟᱱ ᱟᱹᱛᱩ ᱨᱮᱱᱟᱝ ᱥᱟᱱᱟᱢ ᱫᱩᱠ ᱢᱩᱦᱤᱢ ᱥᱟᱦᱟ ᱜᱤᱰᱤ ᱠᱚᱜᱼᱟ | ᱥᱟᱱᱟᱢ ᱠᱟᱹᱢᱤ ᱥᱟᱹᱜᱩᱱ ᱞᱟᱹᱜᱤᱫ ᱦᱚᱸ ᱚᱸᱰᱮ ᱢᱟᱹᱱᱥᱤᱠ ᱜᱚᱜ ᱠᱮᱴᱮᱡ ᱞᱮᱠᱷᱟᱱ ᱢᱟᱨᱟᱝ ᱢᱟᱨᱟᱝ ᱠᱟᱹᱢᱤ ᱦᱚᱸ ᱥᱟᱹᱜᱩᱱᱚᱜᱼᱟ | ᱴᱷᱟᱹᱣᱠᱟᱹ ᱥᱟᱺᱦᱤᱡ ᱢᱮᱱ ᱞᱮᱠᱷᱟᱱ ᱜᱟᱱᱚᱜᱼᱟ ᱪᱤ, ᱥᱤᱧᱵᱤᱨ ᱡᱟᱦᱮᱨ ᱫᱚ ᱟᱵᱚᱣᱟᱜ ᱡᱤᱣᱮ ᱫᱚᱦᱚ ᱧᱟᱢᱚᱜ ᱴᱷᱟᱸᱣ ᱠᱟᱱᱟ | ᱚᱱᱟ ᱜᱮ ᱟᱵᱚᱣᱟᱜ ᱥᱟᱨᱱᱟ ᱫᱷᱚᱨᱚᱢ ᱴᱷᱟᱶ |
               ᱚᱸᱰᱮ ᱫᱚ ᱟᱵᱚ ᱥᱟᱶᱛᱟ ᱨᱮᱱᱟᱜ ᱢᱟᱨᱟᱝ ᱯᱟᱨᱟᱵᱽ ᱯᱷᱟᱹᱜᱩᱱ ᱵᱚᱸᱜᱟ ᱨᱮ ᱵᱟᱦᱟ ᱵᱚᱱ ᱯᱟᱨᱟᱵᱚᱜᱼᱟ |

ᱢᱟᱱ ᱵᱤᱨ ᱡᱟᱦᱮᱨ ᱺᱼ

              ᱢᱟᱱ ᱵᱤᱨ ᱡᱟᱦᱮᱨ ᱫᱚ ᱨᱟᱪᱟ ᱨᱮᱵᱚᱱ ᱵᱚᱸᱜᱟᱭᱟ, ᱡᱟᱦᱟᱸ ᱵᱚᱸᱜᱟ ᱵᱳᱨᱳ ᱨᱟᱪᱟ ᱨᱮᱵᱚᱱ ᱵᱚᱸᱜᱟ ᱵᱳᱨᱳᱭᱟ ᱚᱱᱟᱜᱮ ᱢᱟᱱ ᱵᱤᱨ ᱡᱟᱦᱮᱨ ᱵᱚᱱ ᱢᱮᱱᱟ | ᱱᱚᱰᱮ ᱫᱚ ᱡᱟᱦᱟᱸᱭᱮ ᱵᱚᱸᱜᱟᱭᱟ ᱩᱱᱤ ᱜᱮ ᱱᱟᱭᱠᱮ ᱦᱩᱭ ᱠᱮᱭᱟ |
              ᱱᱚᱣᱟ ᱢᱟᱱᱵᱤᱨ ᱡᱟᱦᱮᱨ ᱨᱮᱫᱚ ᱪᱟᱹᱰᱤ ᱵᱚᱸᱜᱟ ᱟᱨ ᱠᱩᱴᱟᱹᱢ ᱵᱚᱸᱜᱟ ᱮᱢᱟᱱ ᱠᱚ ᱵᱚᱱ ᱵᱚᱸᱜᱟᱭᱟ |

ᱢᱟᱫᱮ ᱵᱤᱨ ᱡᱟᱦᱮᱨ ᱺᱼ

              ᱱᱚᱣᱟ ᱡᱟᱦᱮᱨ ᱛᱟᱵᱚᱱ ᱫᱚ ᱟᱹᱛᱩ ᱠᱷᱚᱱᱟᱜ ᱵᱟᱦᱮᱨ ᱨᱮ ᱡᱟᱦᱟᱸ ᱵᱚᱱ ᱵᱚᱸᱜᱟᱭᱟ ᱚᱱᱟᱜᱮ ᱠᱟᱱᱟ | ᱱᱚᱣᱟ ᱢᱟᱰᱮ ᱵᱤᱨ ᱡᱟᱦᱮᱨ ᱨᱮᱫᱚ ᱡᱟᱦᱟᱸᱭ ᱜᱮ ᱱᱟᱭᱠᱮ ᱜᱟᱱᱚᱜᱼᱟ | ᱱᱚᱰᱮ ᱫᱚ ᱵᱷᱟᱸᱰᱟᱱ ᱨᱮᱱᱟᱝ ᱠᱟᱸᱫᱽ ᱠᱟᱹᱴᱷᱤ ᱮᱢᱟᱱ ᱠᱚᱵᱚᱱ ᱵᱚᱸᱜᱟᱭᱟ |

ᱡᱟᱦᱮᱨ ᱜᱟᱲ ᱟᱨ ᱛᱤᱨᱞᱟᱹ

            ᱟᱵᱚ ᱥᱟᱶᱛᱟ ᱨᱮ ᱢᱤᱫᱴᱟᱝ ᱮᱴᱠᱮᱴᱚᱬᱮ ᱢᱮᱱᱛᱮ ᱵᱚᱱ ᱢᱮᱱᱟ, ᱚᱱᱟᱫᱚ ᱛᱤᱨᱞᱟᱹ ᱠᱩᱲᱤ ᱦᱚᱯᱚᱱ ᱠᱚ ᱡᱟᱦᱮᱨ ᱜᱟᱲ ᱵᱟᱝ ᱠᱚ ᱵᱚᱞᱚᱱᱟ ? ᱚᱱᱟᱢᱟ ᱥᱟᱹᱨᱤ ᱠᱟᱛᱷᱟ, ᱟᱹᱭᱫᱟᱹᱨᱤ ᱛᱟᱦᱮᱱ ᱛᱩᱞᱩᱡ ᱵᱟᱝ ᱠᱚ ᱵᱚᱞᱚᱱ ᱠᱟᱱᱟ |
           ᱵᱟᱰᱟᱭ ᱜᱮᱭᱟᱵᱚᱱ ᱡᱟᱦᱮᱨ ᱜᱟᱲ ᱫᱚ ᱱᱤᱨᱟᱹᱭ ᱱᱟᱯᱟᱭ ᱴᱷᱟᱶ ᱠᱟᱱᱟ | ᱚᱸᱰᱤ ᱫᱚ ᱚᱡᱽᱨᱟ ᱡᱚᱵᱽᱨᱟ ᱪᱤ ᱥᱚ ᱥᱤᱬᱤᱡ ᱵᱟᱝ ᱱᱟᱯᱟᱭᱟ | ᱪᱤᱠᱟᱹᱛᱮ ᱚᱱᱟᱫᱚ ᱟᱵᱚᱣᱟᱜ ᱫᱷᱚᱨᱚᱢ ᱴᱷᱟᱶ ᱠᱟᱱᱟ | ᱚᱱᱟ ᱥᱟᱶᱛᱮ ᱨᱟᱠᱟᱵ ᱵᱚᱸᱜᱟ ᱠᱚ ᱛᱟᱵᱚᱱᱟ | ᱩᱱᱠᱩ ᱦᱚᱸ ᱛᱟᱨᱟ ᱠᱚᱫᱚ ᱵᱟᱝ ᱪᱚ ᱠᱚ ᱥᱟᱦᱟᱣ ᱚᱠᱚᱭᱮ ᱟᱸᱜᱤᱵᱷᱟᱨᱚᱜᱼᱟ | ᱚᱱᱟᱛᱮ ᱠᱩᱲᱤ ᱦᱚᱯᱚᱱ ᱠᱚ ᱥᱤᱧ ᱵᱤᱨ ᱡᱟᱦᱮᱨ ᱫᱚ ᱵᱟᱝ ᱠᱚ ᱵᱚᱞᱚᱱᱟ |
ᱚᱱᱟ ᱠᱷᱟᱹᱛᱤᱨ ᱠᱩᱲᱤ ᱠᱚᱫᱚ ᱢᱟᱲᱟᱝ ᱠᱷᱚᱱ ᱜᱮ ᱯᱤᱞᱪᱩ ᱛᱤᱠᱤᱱ ᱠᱤᱱ ᱦᱟᱹᱴᱤᱧ ᱚᱴᱚ ᱟᱠᱟᱫᱟ | ᱠᱩᱲᱤ ᱦᱚᱯᱚᱱ ᱫᱚ ᱵᱷᱤᱛᱟᱹᱨ ᱵᱚᱸᱜᱟ ᱠᱚᱜᱮ ᱥᱟᱱᱟᱢᱟᱜ ᱠᱚ ᱱᱟᱯᱟᱭᱟ ᱠᱚᱣᱟ |

“ᱵᱷᱤᱛᱟᱹᱨ ᱵᱚᱸᱜᱟ ᱠᱚ ᱢᱟᱬᱟᱝ ᱛᱮᱜᱮ ᱡᱟᱦᱮᱨ ᱵᱚᱸᱜᱟ ᱠᱚᱫᱚ ᱢᱟᱬᱟᱝ ᱠᱚ ᱧᱟᱢᱟ “

ᱚᱸᱰᱮ ᱠᱷᱚᱱ ᱜᱮ ᱥᱟᱱᱟᱢᱟᱜ ᱵᱷᱟᱹᱞᱟᱹᱭ ᱦᱩᱭᱩᱜᱼᱟ | ᱛᱩᱯᱩ ᱯᱷᱟᱨᱪᱟ ᱠᱟᱛᱮ ᱵᱷᱤᱛᱟᱹᱨ ᱜᱮᱡ ᱜᱩᱨᱤᱡ ᱠᱟᱛᱮ ᱞᱚᱴᱟ ᱫᱟᱜ ᱫᱚᱲᱚᱢ ᱠᱟᱛᱮ ᱨᱚᱲ ᱵᱟᱠᱷᱮᱬ ᱞᱮᱠᱷᱟᱱ ᱜᱮ ᱱᱟᱯᱟᱭ ᱦᱩᱭᱩᱜ ᱛᱟᱠᱚᱣᱟ |

ᱚᱱᱟᱛᱮ ᱠᱩᱲᱤ ᱦᱚᱯᱚᱱ ᱡᱟᱦᱮᱨ ᱜᱟᱲ ᱵᱟᱝ ᱥᱮᱱᱚᱜ ᱫᱚ ᱢᱟᱨᱟᱝ ᱮᱴᱠᱮᱴᱚᱬᱮ ᱫᱚ ᱵᱟᱝ ᱠᱟᱱᱟ |

ᱛᱩᱢᱟᱹᱞ ᱟᱠᱟᱱ ᱯᱚᱛᱚᱵ 👉

ᱥᱟᱶᱛᱟᱨᱤ ᱥᱮᱨᱣᱟ
ᱥᱩᱱᱫᱚᱨ ᱢᱳᱦᱚᱱ ᱦᱮᱢᱵᱨᱚᱢ
ᱟᱹᱛᱩ ᱺᱼ ᱩᱞᱤᱰᱤ
ᱰᱟᱠ ᱚᱹ ᱺᱼ ᱡᱟᱨᱠᱟᱬᱮ
ᱛᱷᱟᱱᱟ ᱺᱼ ᱡᱟᱢᱫᱟ, ᱵᱷᱚᱸᱡᱽ,
ᱩᱰᱤᱥᱟᱼ ᱗᱕᱗᱐᱔᱕
᱘᱗᱖᱓᱖᱐᱔᱐᱐᱕,

3940cookie-checkᱡᱟᱦᱮᱨ ᱜᱟᱲ ᱟᱨ ᱛᱤᱨᱞᱟᱹ
RAHA RAHLA

By ᱨᱟᱦᱟ ᱨᱟᱦᱞᱟ

ᱟᱹᱭᱩᱨᱤᱭᱟᱹ