ᱫᱷᱟᱹᱨᱛᱤ ᱡᱟᱠᱟᱛᱨᱮ ᱱᱤᱛᱚᱜ ᱠᱚᱨᱳᱱᱟ ᱟᱡᱟᱨ (COVID-19) ᱯᱟᱥᱱᱟᱣ ᱦᱩᱭ ᱟᱠᱟᱱᱟ | ᱱᱚᱶᱟ ᱟᱡᱟᱨᱛᱮ ᱟᱭᱢᱟ ᱦᱚᱲ ᱴᱟᱴᱠᱟ ᱜᱮᱠᱚ ᱜᱩᱡᱩᱜ ᱠᱟᱱᱟ | ᱢᱟᱹᱱᱢᱤ ᱩᱡᱟᱹᱲᱟᱱ ᱱᱚᱶᱟ ᱵᱚᱛᱚᱨᱟᱱ ᱠᱚᱨᱳᱱᱟ ᱟᱡᱟᱨ ᱫᱚ ᱡᱚᱴᱮᱫᱼᱡᱚᱯᱚᱴᱮᱫ ᱛᱮᱜᱮ ᱢᱤᱫ ᱦᱚᱲ ᱴᱷᱮᱱ ᱠᱷᱚᱱ ᱟᱨ ᱢᱤᱫ ᱦᱚᱲ ᱴᱷᱮᱱ ᱩᱪᱟᱹᱲᱚᱜ ᱠᱟᱱᱟ | ᱱᱚᱶᱟ ᱟᱡᱟᱨ ᱴᱮᱠᱟᱣ ᱫᱟᱨᱟᱢ ᱞᱟᱹᱜᱤᱫ ᱥᱚᱨᱠᱟᱨ ᱫᱚ ᱦᱚᱲ ᱡᱟᱣᱨᱟ ᱢᱤᱫᱩᱜ ᱞᱮᱠᱟᱱ ᱥᱟᱱᱟᱢ ᱠᱟᱹᱢᱤᱦᱚᱨᱟ ᱒᱐᱒᱐ ᱠᱷᱚᱱᱮ ᱵᱟᱨᱚᱱ ᱟᱠᱟᱫᱼᱟ | ᱵᱚᱛᱚᱨᱟᱱ ᱠᱚᱨᱳᱱᱟ ᱟᱡᱟᱨ ᱠᱷᱟᱹᱛᱤᱨ ᱫᱩᱲᱩᱵ ᱧᱟᱯᱟᱢ ᱞᱮᱠᱟᱱ ᱠᱟᱹᱢᱤᱦᱚᱨᱟ ᱢᱮᱱᱢᱟ ᱢᱤᱫᱩᱱ/ ᱢᱤᱪᱷᱤᱞ ᱥᱟᱯᱲᱟᱣ ᱵᱟᱝ ᱦᱩᱭ ᱫᱟᱲᱮᱭᱟᱜ ᱠᱟᱱᱛᱮ ᱵᱷᱤᱰᱤᱭᱚ ᱠᱚᱱᱯᱷᱟᱨᱮᱱᱥ, ᱡᱩᱢ ᱢᱤᱴᱤᱝ, ᱜᱩᱜᱩᱞ ᱢᱤᱴ ᱮᱢᱟᱱ ‘ᱟᱯ’ ᱛᱮ ᱫᱷᱟᱹᱨᱛᱤ ᱡᱟᱠᱟᱛ ᱨᱤᱱ ᱦᱚᱲ ᱟᱯᱟᱱ ᱟᱯᱤᱱ ᱚᱲᱟᱜ ᱠᱷᱚᱱ ᱠᱚ ᱜᱟᱞᱚᱪ ᱫᱟᱲᱮᱭᱟᱜ ᱠᱟᱱᱟ, ᱯᱟᱹᱨᱥᱤ ᱥᱟᱶᱦᱮᱫ ᱞᱟᱦᱟᱱᱛᱤ ᱪᱟᱨᱪᱟ, ᱯᱟᱹᱴᱷᱩᱣᱟᱹ ᱠᱚᱲᱟ/ᱠᱩᱲᱤ ᱠᱚᱣᱟᱜ ᱯᱟᱲᱦᱟᱣ ᱮᱢᱟᱱ ᱦᱩᱭ ᱫᱟᱲᱮᱭᱟᱜ ᱠᱟᱱᱟ | ᱵᱷᱤᱰᱤᱭᱚ ᱠᱚᱱᱯᱷᱟᱨᱮᱱᱥ ᱛᱮᱫᱚ ᱟᱭᱢᱟ ᱦᱚᱲ ᱥᱟᱶ ᱠᱟᱛᱮ ᱜᱟᱞᱚᱪ ᱨᱮᱠᱚ ᱥᱮᱞᱮᱫᱚᱜ ᱠᱟᱱᱟ | ᱚᱱᱟ ᱞᱟᱹᱜᱤᱫ ᱴᱤᱹᱵᱷᱤᱹ ᱥᱮᱴ, ᱠᱮᱢᱮᱨᱟ, ᱞᱟᱯᱴᱚᱯ, ᱤᱱᱴᱟᱨᱱᱮᱴ, ᱵᱤᱡᱽᱞᱤ ᱵᱟᱹᱛᱤ ᱮᱢᱟᱱ ᱛᱟᱦᱮᱸᱱ ᱡᱟᱹᱨᱩᱲᱟ | ᱥᱢᱟᱨᱴ ᱯᱷᱚᱱᱛᱮ ᱵᱷᱤᱰᱤᱭᱚ ᱠᱚᱱᱯᱷᱟᱨᱮᱱᱥ ᱫᱚ ᱵᱟᱠᱚ ᱥᱟᱯᱲᱟᱣ ᱮᱫᱼᱟ |
                        ᱠᱚᱢᱯᱩᱴᱟᱨ, ᱞᱟᱯᱴᱚᱯ ᱟᱨ ᱥᱢᱟᱨᱴ ᱯᱷᱳᱱ ᱛᱮ ᱜᱩᱜᱩᱞ ᱢᱤᱴ / ᱡᱩᱢ ᱢᱤᱴᱤᱝ ᱠᱚ ᱜᱟᱱᱚᱜ ᱠᱟᱱ ᱨᱮᱦᱚᱸ ᱚᱱᱟ ᱞᱟᱹᱜᱤᱫ ᱵᱤᱥᱛᱤ ᱠᱟᱭᱛᱮ ᱥᱢᱟᱨᱴ ᱯᱷᱳᱱ ᱜᱮ ᱵᱮᱵᱷᱟᱨᱚᱜ ᱠᱟᱱᱟ | ᱱᱚᱶᱟᱨᱮ ᱤᱱᱴᱟᱨᱱᱮᱴ ᱰᱟᱴᱟ ᱞᱟᱹᱜᱤᱫ ᱠᱤᱪᱷᱩ ᱜᱟᱱ ᱠᱟᱹᱣᱰᱤ ᱠᱷᱚᱨᱪᱟ ᱠᱟᱱ ᱨᱮᱦᱚᱸ ᱡᱟᱣ ᱞᱮᱠᱟ ᱢᱤᱫᱩᱱ ᱨᱮ ᱥᱮᱞᱮᱫ ᱞᱟᱹᱜᱤᱫ ᱦᱮᱡ ᱥᱮᱱ ᱠᱷᱚᱨᱪᱟ, ᱫᱟᱬᱟ ᱵᱟᱲᱟ ᱚᱠᱛᱚ ᱠᱷᱮᱢᱟᱣ ᱮᱢᱟᱱ ᱠᱚᱫᱚ ᱵᱟᱧᱪᱟᱣᱜ ᱠᱟᱱᱟ | ᱚᱱᱟᱛᱮ ᱱᱤᱛᱚᱜ ᱜᱩᱜᱩᱞ ᱢᱤᱴ/ᱡᱩᱢ ᱢᱤᱴᱤᱝ ᱟᱯ ᱛᱮᱫᱚ ᱥᱚᱨᱚᱠᱟᱨᱤ ᱟᱨ ᱵᱮᱥᱚᱨᱚᱠᱟᱨᱤ ᱦᱚᱛᱮᱛᱮ ᱟᱹᱰᱤ ᱵᱤᱥᱛᱤ ᱵᱮᱵᱷᱟᱨᱚᱜ ᱠᱟᱱᱟ ᱢᱮᱱᱛᱮ ᱵᱟᱰᱟᱭ ᱟᱠᱟᱱᱟ | ᱜᱩᱜᱩᱞ ᱢᱤᱴ ᱪᱮ ᱡᱩᱢ ᱢᱤᱴᱤᱝ ᱨᱮ ᱥᱮᱞᱮᱫ ᱟᱨ ᱱᱟᱯᱟᱭ ᱦᱩᱭᱩᱜ ᱞᱟᱹᱜᱤᱫ ᱞᱟᱹᱠᱛᱤᱭᱟᱱ ᱥᱟᱛᱟᱢ ᱠᱚ ᱤᱫᱤ ᱠᱟᱛᱮ ᱤᱧᱟᱜ ᱵᱤᱪᱟᱹᱨ ᱞᱮᱠᱟᱛᱤᱧ ᱥᱚᱫᱚᱨ ᱮᱫᱼᱟ |

ᱥᱮᱞᱮᱫ ᱞᱟᱦᱟ ᱨᱮᱱᱟᱜ ᱥᱟᱯᱲᱟᱣ

                    ᱡᱟᱦᱟᱸ ᱜᱩᱜᱩᱞ ᱢᱤᱴ ᱟᱨ ᱵᱟᱝᱠᱷᱟᱱ ᱡᱩᱢ ᱢᱤᱴᱤᱝ ᱨᱮ ᱥᱮᱞᱮᱫ ᱦᱩᱭᱩᱜᱼᱟ, ᱚᱱᱟ ᱨᱮᱱᱟᱜ ᱢᱟᱹᱦᱤᱛ, ᱚᱠᱛᱚ, ᱯᱟᱥ ᱚᱣᱟᱨᱰ ᱞᱤᱸᱠ ᱟᱨ ᱥᱟᱛᱟᱢ ᱚᱞ ᱫᱚᱦᱚ ᱟᱨ ᱵᱟᱝᱠᱷᱟᱱ ᱩᱭᱦᱟᱹᱨ ᱫᱚᱦᱚ ᱟᱹᱰᱤ ᱞᱟᱹᱠᱛᱤᱜ ᱠᱟᱱᱟ | ᱜᱩᱜᱩᱞ ᱢᱤᱴᱤᱝ ᱮᱦᱚᱵ ᱞᱟᱦᱟᱨᱮ ᱦᱚᱨᱚᱜ ᱵᱟᱸᱫᱮ ᱥᱟᱯᱲᱟᱣ ᱞᱟᱹᱠᱛᱤᱜ ᱠᱟᱱᱟ | ᱚᱲᱟᱜ ᱨᱮᱱᱟᱜ ᱫᱤᱱᱟᱹᱢ ᱦᱚᱨᱚᱜ ᱵᱟᱸᱫᱮ ᱫᱚ ᱡᱟᱦᱟᱸ ᱦᱟᱠᱟᱱ ᱜᱮ ᱢᱤᱴᱤᱝ ᱨᱮ ᱥᱮᱞᱮᱫ ᱞᱟᱹᱜᱤᱫ ᱱᱟᱥᱮᱱᱟᱜ ᱦᱚᱨᱚᱜ ᱵᱟᱸᱫᱮ, ᱨᱚᱫ ᱱᱟᱹᱠᱤᱡ, ᱢᱮᱫ ᱟᱦᱟᱸ ᱪᱤᱠᱟᱹᱬ, ᱥᱟᱡᱟᱣ ᱫᱚ ᱞᱮᱜᱽ ᱠᱟᱱᱟ᱾ ᱛᱚᱵᱮ, ᱡᱟᱛᱨᱟ ᱞᱮᱠᱟ ᱯᱟᱣᱰᱚᱨ ᱛᱮ ᱯᱚᱛᱟᱣ ᱫᱚ ᱵᱟᱝ ᱞᱟᱹᱠᱛᱤᱜ ᱠᱟᱱᱟ | ᱟᱯᱱᱟᱨᱟᱜ ᱱᱚᱱᱚᱞ (ᱯᱮᱱ), ᱠᱷᱟᱛᱟ, ᱪᱚᱥᱢᱟ, ᱫᱟᱜ ᱵᱳᱛᱩᱞ, ᱮᱢᱟᱨᱡᱮᱱᱥᱤ ᱮᱞᱤᱰᱤ ᱞᱟᱹᱭᱤᱴ ᱮᱢᱟᱱ ᱠᱚ ᱥᱩᱨ ᱨᱮ ᱫᱚᱦᱚ ᱠᱟᱜ ᱦᱩᱭᱩᱜᱼᱟ | ᱜᱟᱞᱚᱪ ᱨᱮ ᱥᱮᱞᱮᱫ ᱞᱟᱹᱜᱤᱫ ᱡᱟᱦᱟᱸ ᱨᱮ ᱫᱩᱲᱩᱵ ᱦᱩᱭᱩᱜᱼᱟ, ᱚᱱᱟ ᱯᱟᱪᱷᱞᱟᱨᱮ ᱪᱮᱫ ᱞᱮᱠᱟᱱ ᱪᱤᱛᱟᱹᱨ ᱪᱮ ᱯᱟᱨᱫᱟ (Back ground scene) ᱛᱟᱦᱮᱸ ᱞᱮᱱ ᱠᱷᱟᱱ ᱱᱟᱯᱟᱭᱚᱜᱼᱟ, ᱚᱱᱟ ᱞᱟᱹᱜᱤᱫ ᱟᱯᱱᱟᱨ ᱛᱮᱜᱮ ᱵᱟᱪᱷᱚᱱ ᱦᱩᱭᱩᱜᱼᱟ | ᱡᱮᱢᱚᱱ ᱧᱮᱧᱮᱞᱤᱭᱟᱹ ᱦᱚᱲ ᱚᱱᱟ ᱵᱟᱠᱚ ᱥᱟᱨᱦᱟᱣ ᱨᱮᱦᱚᱸ ᱴᱚᱴᱚᱥᱟᱜ ᱪᱮ ᱨᱚᱲ ᱢᱟᱸᱜᱟᱞ ᱨᱮᱱᱟᱜ ᱫᱟᱣ ᱦᱚᱸ ᱧᱟᱢ ᱚᱪᱚ ᱫᱚ ᱡᱩᱛ ᱵᱟᱝ ᱠᱟᱱᱟ | ᱛᱤᱱᱟᱝ ᱜᱟᱱ ᱜᱚᱢᱠᱮ ᱱᱚᱣᱟ ᱠᱚᱫᱚ ᱟᱹᱰᱤ ᱠᱷᱟᱢᱠᱷᱤᱭᱟᱞᱤ ᱞᱮᱠᱟ ᱨᱟᱣᱟᱞ ᱜᱮᱠᱚ ᱵᱩᱡᱷᱟᱹᱣ ᱮᱫᱼᱟ | ᱛᱚᱵᱮ ᱚᱱᱠᱟ ᱫᱚ ᱡᱩᱛ ᱵᱟᱝ ᱠᱟᱱᱟ | ᱪᱮᱫᱟᱜ ᱵᱟᱝ ᱢᱟ, ᱱᱚᱶᱟ ᱫᱚ ᱨᱮᱠᱚᱰᱤᱝ ᱠᱟᱛᱮ ᱥᱚᱥᱤᱭᱟᱞ ᱢᱮᱰᱤᱭᱟᱹ ᱨᱮ ᱛᱟᱦᱮᱸᱱ ᱠᱟᱱᱟ, ᱫᱷᱟᱹᱨᱛᱤ ᱡᱟᱠᱟᱛ ᱨᱤᱱ ᱟᱭᱢᱟ ᱦᱚᱲ ᱠᱚ ᱧᱮᱞ ᱮᱫᱼᱟ |

ᱢᱚᱵᱟᱭᱤᱞ ᱠᱮᱢᱮᱨᱟ ᱥᱮᱴᱤᱝ

                   ᱟᱹᱰᱤ ᱜᱟᱱ ᱴᱷᱟᱶᱨᱮ ᱧᱮᱞ ᱟᱠᱟᱱᱟ, ᱜᱟᱞᱚᱪ ᱡᱚᱠᱷᱚᱱ ᱜᱟᱞᱚᱪᱤᱭᱟᱹ ᱠᱚᱣᱟᱜ ᱯᱷᱚᱴᱚ ᱵᱮᱥ ᱞᱮᱠᱟ ᱵᱟᱝ ᱧᱮᱞ ᱧᱟᱢᱚᱜ ᱠᱟᱱᱟ, ᱵᱚᱦᱚᱜ ᱥᱩᱢᱩᱝ ᱦᱚᱸ ᱧᱮᱞᱚᱜ ᱠᱟᱱᱟ᱾ ᱚᱲᱟᱜ ᱵᱷᱤᱛᱨᱤ ᱨᱮᱱᱟᱜ ᱪᱷᱟᱹᱛ, ᱯᱟᱸᱠᱷᱟ, ᱫᱩᱲᱩᱵ ᱟᱠᱟᱱ ᱯᱟᱹᱪᱷᱞᱟ ᱨᱮ ᱜᱷᱟᱨᱚᱸᱡᱽ ᱥᱚᱦᱮᱫ ᱠᱚ ᱦᱮᱡ ᱥᱮᱱ ᱵᱟᱲᱟ ᱧᱮᱞ ᱚᱪᱚ ᱫᱚ ᱵᱮᱥ ᱵᱟᱝ ᱠᱟᱱᱟ | ᱚᱱᱟᱛᱮ ᱢᱤᱴᱤᱝ ᱮᱦᱚᱵ ᱞᱟᱦᱟᱨᱮ ᱥᱮᱞᱯᱷᱤ ᱢᱩᱰ ᱛᱮ ᱟᱯᱱᱟᱨᱟᱜ ᱯᱷᱚᱴᱚ ᱥᱮᱴᱤᱝ ᱡᱟᱹᱨᱩᱲ ᱠᱟᱱᱟ | ᱡᱮᱢᱚᱱ ᱟᱯᱱᱟᱨᱟᱜ ᱯᱷᱚᱴᱚ ᱫᱚ ᱯᱟᱥᱯᱚᱴ ᱥᱟᱭᱤᱡ ᱞᱮᱠᱟ ᱧᱮᱞᱚᱜ ᱢᱟ | ᱢᱮᱱᱢᱟ ᱠᱚᱲᱟᱢ ᱠᱷᱚᱱ ᱢᱮᱫ ᱟᱦᱟᱸ ᱧᱮᱞᱚᱜ ᱢᱟ ᱟᱨ ᱵᱚᱦᱚᱜ ᱟᱞᱚ ᱜᱮᱫᱚᱜ ᱢᱟ | ᱢᱤᱫ ᱫᱷᱟᱣ ᱢᱚᱵᱟᱭᱤᱞ ᱠᱮᱢᱮᱨᱟ ᱥᱮᱴᱤᱝ ᱦᱩᱭ ᱮᱱ ᱛᱟᱭᱚᱢ ᱢᱚᱵᱟᱭᱤᱞ ᱥᱮᱴ ᱫᱚ ᱦᱚᱞᱪᱚᱞ ᱵᱟᱝ ᱞᱟᱹᱠᱛᱤ ᱠᱟᱱᱟ |
                   ᱜᱩᱜᱩᱞ ᱢᱤᱴ ᱪᱮ ᱡᱩ ᱢᱤᱴᱤᱝ ᱨᱮ ᱟᱭᱢᱟ ᱦᱚᱲ ᱠᱚᱣᱟᱜ ᱨᱚᱲ ᱡᱩᱛ ᱥᱟᱺᱦᱤᱡ ᱵᱟᱝ ᱟᱸᱡᱚᱢᱜ ᱠᱟᱱᱟ | ᱚᱱᱟ ᱞᱟᱹᱜᱤᱫ ᱦᱩᱰᱤᱧ ᱢᱟᱭᱠᱨᱚᱯᱷᱚᱱ ᱢᱟᱭᱤᱠ ᱦᱚᱸ ᱢᱚᱪᱟ ᱥᱩᱨ ᱫᱚᱛᱚ ᱟᱨ ᱵᱟᱝᱠᱷᱟᱱ ᱥᱟᱹᱲᱤᱨᱮ ᱩᱠᱩᱛᱮ ᱨᱮᱛᱟᱢ ᱫᱚᱦᱚ ᱠᱟᱜ ᱠᱷᱟᱱ ᱨᱚᱲ ᱫᱚ ᱟᱹᱰᱤ ᱱᱤᱥᱴᱟᱹ ᱯᱩᱥᱴᱟᱹ ᱟᱸᱡᱚᱢᱚᱜᱼᱟ | ᱢᱚᱵᱟᱭᱤᱞ ᱨᱮ ᱱᱚᱶᱟ ᱠᱚ ᱥᱮᱴᱤᱝ ᱞᱟᱹᱜᱤᱫ ᱟᱭᱢᱟ ᱞᱮᱠᱟᱱᱟᱜ ᱥᱟᱢᱟᱱ ᱵᱟᱡᱟᱨ ᱟᱨ ᱚᱱᱞᱟᱭᱤᱱᱛᱮ ᱧᱟᱢᱚᱜ ᱠᱟᱱᱟ, ᱚᱱᱟ ᱠᱚᱨᱮᱱᱟᱜ ᱜᱚᱲᱚ ᱦᱚᱸ ᱤᱫᱤ ᱜᱟᱱᱚᱜᱼᱟ |

ᱥᱯᱤᱠᱟᱨ ᱟᱨ ᱵᱷᱤᱰᱤᱭᱚ ᱥᱮᱴᱤᱝ

                     ᱜᱩᱜᱩᱞ ᱢᱤᱴ ᱪᱮ ᱡᱩᱢ ᱢᱤᱴᱤᱝ ᱨᱮ ᱥᱮᱞᱮᱫ ᱞᱟᱹᱜᱤᱫ ᱞᱤᱸᱠ ᱨᱮ ᱟᱨᱫᱟᱥ ᱚᱛᱟ ᱭᱮᱱ ᱠᱷᱟᱱ ᱚᱱᱟ ᱫᱚ ᱟᱰᱢᱤᱱ ᱴᱷᱮᱱ ᱥᱮᱴᱮᱨᱚᱜᱼᱟ ᱟᱨ ‘ᱚᱠᱮ’ ᱠᱮᱫ ᱠᱷᱟᱱ ᱟᱹᱵᱤᱱᱟᱜ ᱢᱚᱦᱚᱨ ᱫᱚ ᱵᱷᱤᱰᱤᱭᱚ ᱨᱮ ᱧᱮᱞ ᱜᱚᱫᱚᱜᱼᱟ | ᱥᱯᱤᱠᱟᱨ ᱦᱚᱸ ‘ᱚᱱ’ ᱛᱟᱦᱮᱸᱱ ᱠᱷᱟᱱ ᱨᱚᱲ ᱦᱚᱸᱠᱚ ᱟᱸᱡᱚᱢ ᱛᱟᱹᱵᱤᱱᱟ | ᱥᱮᱞᱮᱫ ᱦᱩᱭ ᱮᱱ ᱛᱟᱭᱚᱢ ᱥᱯᱤᱠᱟᱨ ᱟᱨ ᱵᱷᱤᱰᱤᱭᱚ ᱫᱚ ᱞᱟᱹᱠᱛᱤ ᱡᱟᱹᱱᱤᱡ ‘ᱚᱯ’ ᱦᱩᱭᱩᱜᱼᱟ ᱟᱨ ᱵᱟᱝᱠᱷᱟᱱ ᱜᱟᱞᱚᱪ ᱨᱮ ᱮᱴᱠᱮᱴᱚᱬᱮ ᱦᱩᱭᱩᱜᱼᱟ᱾ ᱚᱱᱟ ᱠᱷᱟᱹᱛᱤᱨ ᱟᱰᱢᱤᱱ ᱫᱚ ᱚᱯ (Mute) ᱞᱟᱹᱜᱤᱫ ᱦᱚᱸᱭ ᱵᱚᱲᱦᱮᱜᱼᱟ | ᱟᱰᱢᱤᱱ ᱜᱚᱢᱠᱮᱭᱟᱜ ᱟᱨᱫᱟᱥ ᱞᱮᱠᱟᱛᱮ ᱜᱟᱞᱢᱟᱨᱟᱣ ᱨᱮᱱᱟᱜ ᱫᱟᱣ ᱧᱟᱢ ᱮᱱ ᱡᱚᱠᱷᱚᱱ ᱥᱯᱤᱠᱟᱨ ᱫᱚ ᱚᱱ (Unmute) ᱥᱟᱶᱛᱮ ᱵᱷᱤᱰᱤᱭᱚ ᱦᱚᱸ ᱚᱱ ᱦᱩᱭᱩᱜᱼᱟ | ᱜᱟᱞᱢᱟᱨᱟᱣ ᱛᱟᱭᱚᱢ ᱞᱟᱹᱠᱛᱤ ᱵᱟᱝ ᱠᱷᱟᱱ ᱥᱯᱤᱠᱟᱨ ᱟᱨ ᱵᱷᱤᱰᱤᱭᱚ ᱫᱚ ‘ᱚᱯ’ ᱠᱟᱜ ᱨᱮᱦᱚᱸ ᱜᱟᱞᱢᱟᱨᱟᱣ ᱫᱚ ᱧᱮᱞ ᱟᱨ ᱟᱸᱡᱚᱢᱚᱜ ᱜᱮᱭᱟ | ᱛᱚᱵᱮ, ᱱᱚᱝᱠᱟᱱ ᱚᱠᱛᱚᱨᱮ ᱦᱟᱱᱛᱮ ᱱᱷᱟᱛᱮ ᱫᱟᱬᱟ ᱵᱟᱲᱟ ᱫᱚ ᱡᱩᱛ ᱵᱟᱝ ᱠᱟᱱᱟ | ᱜᱟᱞᱢᱟᱨᱟᱣ ᱫᱚ ᱢᱚᱱ ᱞᱟᱜᱟᱣ ᱠᱟᱛᱮ ᱟᱸᱡᱚᱢ ᱞᱮᱠᱷᱟᱱ ᱢᱤᱴᱤᱝ ᱨᱮᱱᱟᱜ ᱞᱟᱵᱽ ᱫᱚ ᱡᱟᱹᱨᱩᱲ ᱧᱟᱢᱚᱜ ᱜᱮᱭᱟ |                                                                                                                                                   ᱜᱩᱜᱩᱞ ᱢᱤᱴ ᱪᱮ ᱡᱩᱢ ᱢᱤᱴᱤᱝ ᱨᱮᱱᱟᱜ ᱜᱟᱞᱢᱟᱨᱟᱣ ᱟᱹᱣᱨᱤ ᱪᱟᱵᱟᱜ ᱫᱷᱟᱹᱨᱤᱡ ᱱᱚᱶᱟ ᱣᱮᱵᱽᱞᱟᱹᱭᱤᱱ ᱢᱤᱴᱤᱝ ᱫᱚ ᱵᱤᱱᱟᱹ ᱠᱟᱨᱚᱱ ᱛᱮ ᱵᱟᱹᱜᱤ (Left) ᱡᱩᱛ ᱵᱟᱝ ᱠᱟᱱᱟ |

ᱜᱩᱜᱩᱞ ᱢᱤᱴ ᱪᱮ ᱡᱩᱢ ᱢᱤᱴᱤᱝ ᱨᱮᱱᱟᱜ ᱚᱠᱛᱚ ᱵᱚᱨᱟᱫᱽ

                    ᱣᱮᱵᱽᱞᱟᱭᱤᱱ ᱛᱮ ᱦᱩᱭᱩᱜ ᱠᱟᱱ ᱛᱤᱱᱟᱝᱜᱟᱱ ᱜᱩᱜᱩᱞ ᱢᱤᱴ ᱟᱨ ᱡᱩᱢ ᱢᱤᱴᱤᱝ ᱨᱮ ᱟᱭᱢᱟ ᱯᱮᱲᱟ ᱠᱚᱣᱟᱜ ᱡᱤᱞᱤᱧ ᱜᱟᱞᱚᱪ ᱠᱷᱟᱹᱛᱤᱨ ᱜᱟᱞᱚᱪ ᱨᱮᱱᱟᱜ ᱚᱠᱛᱚ ᱫᱚ ᱓/᱔ ᱴᱟᱲᱟᱝ ᱠᱷᱚᱱ ᱵᱤᱥᱛᱤ ᱦᱩᱭᱩᱜ ᱠᱟᱱᱟ | ᱩᱱᱟᱝ ᱵᱤᱥᱛᱤ ᱜᱷᱟᱹᱲᱤᱠ ᱟᱸᱡᱚᱢ ᱞᱟᱹᱜᱤᱫ ᱟᱸᱡᱚᱢᱤᱭᱟᱹ ᱠᱚᱣᱟᱜ ᱫᱷᱤᱨᱚᱡᱽ ᱵᱟᱝ ᱛᱟᱦᱮᱸᱱ ᱠᱟᱱᱟ ᱪᱮ ᱥᱟᱹᱨᱤᱭᱟᱜ ᱥᱤᱵᱤᱞ ᱥᱟᱛᱟᱢ ᱠᱚᱦᱚᱸ ᱦᱮᱣᱮᱨ ᱜᱚᱫᱚᱜ ᱠᱟᱱᱟ | ᱮᱦᱚᱵ ᱮᱦᱚᱵ ᱨᱮ ᱡᱟᱦᱟᱸ ᱛᱤᱱᱟᱝ ᱟᱸᱡᱚᱢᱤᱭᱟᱹ ᱥᱮᱞᱮᱫ ᱠᱚ ᱛᱟᱦᱮᱸᱱ ᱠᱟᱱᱟ, ᱵᱟᱨ ᱴᱟᱲᱟᱝ ᱜᱟᱱ ᱛᱟᱭᱚᱢᱛᱮ ᱩᱱᱠᱩ ᱫᱚᱠᱚ ᱵᱟᱹᱜᱤ (Left) ᱮᱫ ᱠᱟᱱᱟ | ᱚᱠᱛᱚ ᱨᱮᱱᱟᱜ ᱟᱱᱟᱴ ᱠᱷᱟᱹᱛᱤᱨ ᱜᱩᱜᱩᱞ ᱢᱤᱴ ᱨᱮᱱᱟᱜ ᱚᱠᱛᱚ ᱒ ᱴᱟᱲᱟᱝ ᱠᱷᱚᱱ ᱒ᱹ᱓᱐ ᱢᱩᱸᱫᱽ ᱨᱮᱜᱮ ᱪᱟᱵᱟ ᱞᱟᱹᱠᱛᱤ ᱠᱟᱱᱟ | ᱜᱟᱞᱢᱟᱨᱟᱣ ᱠᱚᱫᱚ ᱵᱩᱴᱟᱹ ᱟᱨ ᱱᱤᱥᱴᱟᱹ ᱦᱩᱭᱩᱜ ᱞᱟᱹᱠᱛᱤᱜ ᱠᱟᱱᱟ | ᱡᱮᱢᱚᱱ ᱟᱸᱡᱚᱢ ᱡᱚᱝ ᱨᱮ ᱨᱟᱹᱥᱠᱟᱹ ᱛᱟᱦᱮᱸ ᱢᱟ | ᱱᱚᱶᱟ ᱤᱫᱤ ᱠᱟᱛᱮ ᱟᱰᱢᱤᱱ ᱜᱚᱢᱠᱮ ᱠᱚ ᱢᱮᱫ ᱞᱩᱛᱩᱨ ᱞᱟᱹᱠᱛᱤᱜ ᱠᱟᱱᱟ |

ᱥᱟᱶᱦᱮᱫ ᱪᱟᱨᱪᱟ ᱥᱚᱨᱮᱥ ᱚᱱᱚᱞ ᱠᱚ ᱯᱟᱨᱥᱟᱞ ᱞᱟᱹᱠᱛᱤᱜ ᱠᱟᱱᱟ

                  ᱜᱩᱜᱩᱞ ᱢᱤᱴ ᱟᱨ ᱵᱟᱝ ᱢᱟ ᱡᱩᱢ ᱢᱤᱴᱤᱝ ᱨᱮ ᱡᱟᱦᱟᱸ ᱥᱟᱛᱟᱢ ᱟᱨ ᱥᱟᱶᱦᱮᱫ ᱚᱱᱚᱞᱤᱭᱟᱹ ᱟᱨ ᱱᱮᱶᱛᱟ ᱯᱮᱲᱟ ᱠᱚ ᱪᱟᱨᱪᱟ ᱮᱫᱼᱟ ᱟᱨ ᱵᱟᱝ ᱢᱟ ᱠᱚ ᱩᱪᱷᱟᱹᱱ ᱮᱫᱼᱟ, ᱚᱱᱟ ᱠᱚᱫᱚ ᱟᱹᱰᱤ ᱞᱟᱹᱠᱛᱤᱭᱟᱱᱟ ᱠᱟᱱᱟ | ᱚᱱᱟ ᱠᱚᱨᱮᱱᱟᱜ ᱨᱮᱠᱚᱰᱤᱝ ᱠᱚᱫᱚ ᱥᱚᱥᱤᱭᱟᱞ ᱢᱮᱰᱤᱭᱟᱹ ᱟᱨ ᱭᱩᱴᱩᱵᱽ ᱞᱤᱸᱠ ᱨᱮ ᱧᱟᱢᱚᱜ ᱠᱟᱱᱟ | ᱰᱤᱡᱤᱴᱟᱞ ᱛᱮ ᱱᱚᱣᱟ ᱠᱚᱨᱮᱱᱟᱜ ᱨᱮᱠᱚᱰ ᱢᱟ ᱛᱟᱦᱮᱸᱱ ᱠᱟᱱ ᱜᱮᱭᱟ, ᱛᱚᱵᱮ ᱪᱷᱟᱯᱟ ᱯᱟᱨᱥᱟᱞ ᱠᱟᱛᱮ ᱦᱚᱸ ᱨᱮᱠᱚᱰ ᱫᱚ ᱫᱚᱦᱚ ᱞᱟᱹᱠᱛᱤᱜ ᱠᱟᱱ ᱜᱮᱭᱟ | ᱚᱱᱟᱛᱮ ᱚᱱᱟ ᱠᱚᱫᱚ ᱜᱩᱜᱩᱞ ᱢᱤᱴ ᱥᱟᱯᱲᱟᱣ ᱮᱫ ᱜᱟᱶᱛᱟ/ᱥᱮᱢᱞᱮᱫ ᱦᱚᱛᱮᱛᱮ ᱚᱠᱛᱚ ᱡᱟᱹᱱᱤᱡ ᱪᱷᱟᱯᱟ ᱯᱟᱨᱥᱟᱞ ᱞᱟᱹᱠᱛᱤᱜ ᱠᱟᱱᱟ ᱟᱨ ᱵᱟᱝᱠᱷᱟᱱ ᱥᱟᱱᱛᱟᱲᱤ ᱯᱟᱛᱷᱟᱢ / ᱵᱮᱣᱨᱟ ᱥᱟᱠᱟᱢ ᱠᱚᱨᱮ ᱦᱚᱸ ᱯᱟᱨᱥᱟᱞ ᱡᱟᱹᱨᱩᱲ ᱠᱟᱱᱟ |

ᱢᱟᱹᱭ ᱥᱩᱨᱩᱠᱩᱱᱤ ᱢᱩᱨᱢᱩ, ᱵᱤᱥᱣᱚᱼᱵᱷᱟᱨᱚᱛᱤ ᱡᱮᱜᱮᱛ ᱵᱤᱨᱫᱟᱹᱜᱟᱲ, ᱥᱟᱱᱛᱤᱱᱤᱠᱮᱛᱚᱱ, ᱵᱚᱞᱯᱩᱨ, ᱯᱹᱵᱹ

5560cookie-checkᱟᱯᱟᱱ ᱟᱯᱤᱱ ᱚᱲᱟᱜ ᱠᱷᱚᱱ ᱜᱟᱞᱚᱪ ᱨᱮᱱᱟᱜ ᱫᱟᱣ ᱺ ᱜᱩᱜᱩᱞ ᱢᱤᱴ ᱟᱨ ᱡᱩᱢ ᱢᱤᱴᱤᱝ